Karantın tártibin buzǵan elordalyqtarǵa 60 mln astam teńge aıyppul salyndy

NUR-SULTAN. QazAqparat – Nur-Sultan qalasynyń bas memlekettik sanıtarlyq dárigeri Sarhat Beısenova shekteý sharalaryna qaramastan qyzmetin zańsyz jalǵastyrǵan kásipkerlik nysandar týraly aıtyp berdi, dep habarlaıdy QazAqparat tilshisi.

«Qabyldanyp jatqan aldyn alý, túsindirý sharalaryna, shekteý jáne úlken ákimshilik sanktsııalarǵa qaramastan, jyl basynan beri kásipkerlik sýbektileri de, jeke tulǵalar da 287 buzýshylyq faktisine jol berdi», - dedi S. Beısenova Nur-Sultan qalasynyń ákimdigi uıymdastyrǵan onlaın-brıfıngte.

Atalǵan zańbuzýshylyqtar úshin 258 jeke jáne zańdy tulǵa 60 403 560 teńgege ákimshilik jaýapqa tartyldy. Onyń ishinde 149 kásipkerlik sýbektisi – 55 634 265 teńge somasyna jáne 109 jeke tulǵa - 4 769 295 teńge somasyna jaýapqa tartylǵan.

«Búginde sot 18 kásipkerlik nysanyn ákimshilik jaýapqa tartý jáne qyzmetin toqtata turý týraly sheshim qabyldady. Biraq «Alanııa» túngi klýby, «Echo» laýndj bary, «Storıs» laýndj bary, «Raspawn» kompıýterlik klýby, «Abba» laýndj bary, «GINZA» karaoke-meıramhanasy, «Cabera» resto-bary, «Tabys» dúkeni óz qyzmetin jalǵastyrǵan. 2021 jylǵy 26 qańtarda jáne 11 aqpanda sot oryndaýshylary sot qaýlylarynyń nysandar qyzmetin toqtata turý bóligin oryndaý maqsatynda esikterin mórleý arqyly «Tequila» karaoke bary men «ZOLOTO» meıramhanasynyń qyzmetin toqtatty. Soǵan qaramastan, «Doganstroy» JShS jáne «Tequila» kafe baryn ashyp, óz qyzmetin jalǵastyrǵan», - dep atap ótti spıker.

Atalǵan fakti boıynsha departament Nur-Sultan qalasynyń Ádilet departamentine sot sheshimin oryndamaǵany úshin ákimshilik jaýapqa tartý týraly hat joldaǵan.

«Jeke jáne zańdy tulǵalardyń sot sheshimderin oryndamaǵany úshin QR ÁQBK 669-baby boıynsha jeke tulǵalarǵa 5 AEK aıyppul salý nemese bes táýlikke deıin ákimshilik qamaýǵa alý, al kásipkerlik sýbektileri úshin sanatqa qaraı 30-dan 50 AEK-ke deıingi ákimshilik jaýapkershilik kózdelgen. Sondaı-aq, sot sheshimin oryndamaǵany úshin QR Qylmystyq Kodeksiniń 430-babymen qylmystyq jaýapkershilik kózdelgen, onyń sanktsııasymen segiz júz saǵatqa deıingi merzimge qoǵamdyq jumystarǵa tartý ne úsh jylǵa deıingi merzimge bas bostandyǵyn shekteý nemese sol merzimge bas bostandyǵynan aıyrý jazasy kózdelgen», - dep eske saldy elordalyq bas sanıtarlyq dáriger.