Karantın: «Sary aımaqta» turǵan óńirlerde saýda úıleri jeksenbi kúnderi de isteıdi

NUR-SULTAN. QazAqparat - 7 kún boıy «sary aımaqta» bolǵan óńirlerde bıylǵy jyldyń 1 naýryzynan bastap jabyq bazarlardyń (azyq-túlik, azyq-túlik emes), saýda jáne oıyn-saýyq ortalyqtarynyń, saýda úıleriniń, saýda jelileriniń jeksenbi kúnderi jumys isteýine ruqsat etiledi.

Bul týraly búgin QR Premer-Mınıstriniń orynbasary Eraly Toǵjanov tóraǵalyq etken koronavırýs ınfektsııasynyń taralýyna jol bermeý jónindegi vedomstvoaralyq komıssııanyń otyrysynda málim boldy.

Monıtorıngtik tekserý qorytyndysy boıynsha bilim berý uıymdarynda sanıtarlyq-epıdemıologııalyq talaptardyń buzylý faktileri kóp tirkelgen Mańǵystaý, Qostanaı jáne Jambyl oblystaryn qospaǵanda, barlyq oblystarda ústimizdegi jyldyń 1 naýryzynan bastap 1-5 synyptardyń, halyqaralyq mektepterde 1-7 synyptardyń oqýshylaryn aralas oqytýǵa ruqsat etiledi.