Karantın: «Mıssıs Aqtóbe» baıqaýyn uıymdastyrǵandardy sanıtar mamandar tekseredi

AQTÓBE. QazAqparat – «Sary» aımaqtaǵy karantındik shekteýdi eskermegender «Mıssıs Aqtóbe» baıqaýyn uıymdastyrdy. Qazir oblystyq sanıtarııalyq-epıdemıologııalyq baqylaý departamenti BAQ-ta jarııalanǵan materıaldy tekserip jatyr, dep habarlaıdy QazAqparat tilshisi.

Aqtóbe oblysy qazir «sary» aımaqta tur. Ótken táýlikte óńirde 50 adamnan koronavırýs ınfektsııasy anyqtaldy. Onyń 40-y vırýstyń sımptomdy túrine shaldyqqan.

Onyń kóbi Aqtóbe qalasynyń, ózgesi Muǵaljar, Alǵa, Oıyl, Temir aýdandarynyń turǵyny. Aýrý kórsetkishiniń ósý deńgeıi 1% qurady.

Aqtóbe óńirlik kommýnıkatsııalar qyzmetinde ótken baspasóz máslıhatynda oblystyń bas sanıtar dárigeri karantın kezinde baıqaý ótkizgenderge qatysty túsinik berdi.

«Bul úlken sharany ótkizý úshin ruqsat alǵan eshkim bolmady. Aqtóbe qalalyq sanıtarııalyq-epıdemıologııalyq baqylaý basqarmasy men oblystyq sanıtarııalyq-epıdemıologııalyq baqylaý departamentinen ruqsat berilmedi. BAQ estigen soń mádenıet basqarmasy men monıtorıng topq suranys jiberildi. Olardan shaǵym tússe, tekserý júrgizilip, uıymdastyrýshyǵa ákimshilik shara qoldanylady», - dedi oblystyq sanıtarııalyq-epıdemıologııalyq baqylaý departamentiniń basshysy Nursulý Berkimbaeva.

Aıta keteıik, oblys boıynsha barlyǵy 4854 jaǵdaı tirkelse, onyń 90% jazyldy.

Naýqastarmen qarym-qatynasta bolǵan 1 myńǵa jýyq adam úı karantıninde.

Olar eki apta dáriger baqylaýynda bolady. Qańtarda 26, aqpanda 33, naýryzda 63 oqýshydan koronavırýs ınfektsııasy anyqtalǵan.

Jyl basynan beri 34 muǵalimnen COVID-19 tirkeldi. Qańtarda 4, aqpanda 12, naýryzda 18 jaǵdaı anyqtaldy.

«Qazir jansaqtaý bóliminde 13 naýqas jatyr. Onyń ekeýi ókpeni jasandy jeldetý apparatyna qosylǵan», - dedi oblystyq densaýlyq saqtaý basqarmasynyń basshysy Rústem Isaev.