Karantın: Mereke kúnderi Almatyda myńnan astam nysan tekserildi

ALMATY. QazAqparat- Almaty qalasy ákiminiń orynbasary Erjan Babaqumarov koronavırýs ınfektsııasynyń taralýyna jol bermeý úshin 21 naýryzdan bastap engizilgen kúsheıtilgen shekteý sharalarynyń saqtalýyn baqylaý jónindegi monıtorıng toptarynyń jumysy boıynsha onlaın formatta keńes ótkizdi, dep habarlaıdy QazAqparat tilshisi.

Keńes barysynda aýdandyq monıtorıng toptardyń, qalalyq qoǵamdyq densaýlyq basqarmasy, sanıtarlyq-epıdemıologııalyq baqylaý departamenti jáne jergilikti polıtsııa qyzmeti basshylarynyń antıkovıdtik sharalardy buzý faktilerin jedel anyqtaý jáne jolyn kesý algorıtmin saqtaý boıynsha baıandamalary tyńdaldy.

Qalanyń bas memlekettik sanıtar dárigeri, sanıtarlyq-epıdemıologııalyq baqylaý departamentiniń basshysy Jandarbek Bekshın aýdan ákimdikteri janyndaǵy monıtorıng toptardyń basshylary usynǵan materıaldar boıynsha 21-24 naýryz aralyǵynda 92 tekserý júrgizilip, 1080 nysan qamtylǵanyn, onyń 233-ine belgilengen jumys rejıminiń buzylǵany jáne epıdemııaǵa qarsy talaptardyń saqtalmaǵanyn habarlady.

Sonymen qatar, 29 buzýshylyq 24 naýryzdan 25 naýryzǵa qaraǵan túngi tekserý barysynda anyqtaldy. Máselen, 233 kásipkerlik obektisine 230 AEK kóleminde aıyppul salynady. Sonymen qatar, karantın sharalaryn buzǵany úshin jeke tulǵalarǵa 772 hattama toltyryldy.

Erjan Babaqumarov sanıtarlyq-epıdemıologııalyq rejımdi buzý saldarynan juqtyrý oqıǵalarynyń ósýi jalǵasyp jatqan aýdandarda monıtorıngtik toptardyń jumysyn kúsheıtýdi tapsyrdy.

Almaty «qyzyl aımaqta» tur. Ótken táýlikte qalada koronavırýs ınfektsııasyn juqtyrǵan 341adam anyqtaldy. Mektep jasyna deıingi balalar arasynda aýrýshańdyqtyń 3 esege (táýligine - 17 juqtyrý jaǵdaıy) jáne onlaın oqytýdaǵy oqýshylar arasynda - 4 esege (28 jaǵdaı) óskeni baıqalady. Ata-analarǵa aldyn alý sharalarynyń mańyzdylyǵy týraly balalarmen túsindirý jumystaryn kúsheıtý usynylady.

Burynǵysynsha táýekel tobynda - 65 jastan asqan jáne sozylmaly aýrýlarmen aýyratyn adamdarǵa múmkindiginshe úılerinen shyqpaýǵa keńes beriledi. Sonymen qatar, 20-29 jas aralyǵyndaǵy adamdar arasynda ınfektsııanyń ósýi baıqaldy.Taldaý kórsetkendeı, qoǵamdyq mekemelerden basqa, jeke sektorda adamdardyń toptasýy kóbeıgeni baıqalady - otbasylyq is-sharalardan, úılený toılarynan, eske alýlardan jáne úıdegi toılardan juqtyrý jaǵdaılaryn tirkeý jalǵasýda.

Almaty ákimdigi qala turǵyndary men qonaqtaryn jaýapkershilikpen qaraýǵa, adamdar kóp jınalatyn oryndarǵa barmaýǵa, buqaralyq is-sharalardy uıymdastyrmaýǵa jáne qatyspaýǵa shaqyrady. Kem degende 1,5-2 metr áleýmettik qashyqtyqty saqtaý jáne betperde kııý mańyzdy.

Eske salsaq, karantındik sharalardy buzǵany úshin ákimshilik jaýapkershilik qarastyrylǵan.