Karantın: Memqyzmetshilerdiń basym bóligi qashyqtan jumys isteýdi oń baǵalaǵan

NUR-SULTAN. QazAqparat - Koronavırýs pandemııasyna baılanysty karantındi engizý aqparattyq tehnologııalardy qoldanýdy jedeldetip, osy saladaǵy jańa múmkindikter men problemalardy kórsetti. Osyǵan oraı, QR Memlekettik qyzmet isteri agenttigi, Astana memlekettik qyzmet haby, QR Prezıdenti janyndaǵy Memlekettik basqarý akademııasy jáne Atyraý memlekettik ýnıversıteti birlesip uıymdastyrǵan «Memlekettik qyzmetshilerdiń qashyqtyqtan jumysy» atty halyqaralyq konferentsııada birqatar máseleler talqylandy.

Onlaın konferntsııada Astana memlekettik qyzmet haby Basqarýshy komıtet tóraǵasy Alıhan Baımenov qatysýshylarǵa jyly lebizin bildirdi.

«Pandemııa qysqa merzimdi qubylys bolýy múmkin, biraq onyń áseri - sózsiz uzaq merzimderge sozylady. Barlyq elderde memlekettik basqarý úlken synaqtan ótýde. Bul kezeńde azamattar barlyq qajetti qyzmetterdi tolyq kólemde ala alatyndyǵyna jáne memleket salyq tóleýshiler qarajatyn tıimdi jumsaıdy dep kútýge quqyly. Sonymen qatar, sheshimderdi jedel qabyldaý barysynda ashyqtyq pen esep berýshilik qaǵıdatyn saqtaý mańyzdy», – dedi A. Baımenov.

Al Memlekettik qyzmet isteri agenttigi tóraǵasynyń orynbasary Darhan Jazyqbaevtyń aıtýynsha, karantınniń engizilýine baılanysty sharalardyń biri - memlekettik organdardyń qashyqtan jumys isteý formatyna kóshýi boldy. «Qazirgi ýaqytta memlekettik qyzmetshilerdiń 70%-y qashyqtan jumys isteýde. Mundaı jumysty uıymdastyrýda tájirıbe almasý men ony talqylaý mańyzdy» dedi ol.

Budan bólek, Grýzııa Memlekettik qyzmet bıýrosy Taldaý departamenti basshysy Irına Agapıshvılı, Ázerbaıjan Memlekettik emtıhan ortalyǵy tóraǵasynyń orynbasary Bahram Halılov óz elderinde memlekettik qyzmette qashyqtan jumysty engizý tájirıbesimen bólisti. Olar memlekettik qyzmetshilerdi qashyqtan jumys isteýge kóshirý úshin aldyn-ala daıyndyq jumystaryn júrgizý men qajetti quzyretterdi damytý qajettiligin atap ótti. Sonymen qatar, «Tonys Imported Marble and Tile» (Massachýsets shtaty, AQSh) kompanııasynyń dırektory Glen Zıgmýntovıch AQSh-taǵy qashyqtyqtan jumys jasaýǵa kóshý tájirıbesimen bólisti. SЅІ kompanııasynyń Bas áriptesi Oljas Qudaıbergenov tótenshe jaǵdaı kezindegi memlekettik apparattyń tıimdiligi týraly óz kózqarasyn bildirdi.

Konferentsııada karantın kezindegi Qazaqstannyń memlekettik qyzmetshileriniń qashyqtan jumys jasaý tájirıbesi týraly saýalnama nátıjeleri tanystyryldy. Saýalnama respondentterdiń jartysynan astamy qashyqtan jumys túrine kóshýdi oń baǵalaıtynyn, biraq uıymdastyrýshylyq jáne tehnıkalyq problemalardyń bar ekendigin kórsetti. Respondentterdiń 31%-y tehnıkalyq aqaýlar jıi bolatynyn, 19%-y Internet sapasynyń óte tómen ekenin atap ótti.

Konferentsııaǵa Qazaqstannyń ortalyq jáne jergilikti atqarýshy organ ókilderi de qatysty.