Karantın: Qostanaı oblysynda jasóspirim balalar túngi klýbta kóńil kóterip júrgen
Reıd barysynda karantın rejımi kezinde jumys istep kelgen oıyn-saýyq nysany anyqtaldy.
Monıtorıng toby kelgen kezde demalys klýbynda 60-tan astam adam bolǵan, onyń ishinde kámeletke tolmaǵan birneshe bala bar.
Olar óńirdegi qatań karantınge qaramastan demalys keshin uıymdastyrǵan.
«Karantındik sharalardy buzý jáne kámeletke tolmaǵandardyń túngi ýaqytta oıyn-saýyq mekemesinde bolýyna jol berý faktisi boıynsha ákimshilik materıaldar jınaldy. Kámeletke tolmaǵandardyń ata-anasyna qatysty QR ÁQBtK 442-babynyń 1-bóligi boıynsha ákimshilik hattama toltyryldy. Sondaı-aq demalys nysanynyń ákimshisi de jaýapqa tartylady» delingen oblystyq polıtsııa departamentiniń baspasóz habarlamasynda.
Eske salaıyq, Qostanaı oblysy 2021 jyldyń qańtarynan bastap «qyzyl aımaqta» tur.
Jyl basynan beri karantın rejımin buzǵan 211 nysan jaýapqa tartyldy.