Karantın: Kókshetaýda monıtorıngtik top eki úılený toıyn toqtatty

KÓKShETAÝ. QazAqparat – Kókshetaýda monıtorıngtik top karantın talaptaryn buza otyryp ótkizilgen eki úılený toıyn anyqtady, dep habarlaıdy QazAqparat tilshisi Aqmola oblystyq sanıtarlyq-epıdemıologııalyq baqylaý departamentiniń baspasóz qyzmetine silteme jasap.

Vedomstvonyń málimetinshe, Aqmola oblysy koronavırýstyń taralý qarqyny boıynsha «qyzyl» aımaqta ornalasqanyna qaramastan, óńirde karantın rejımin buzý oqıǵalary jalǵasýda.

«Ótken táýlikte monıtorıngtik top Kókshetaý qalasyndaǵy «Rýbın» meıramhanasynda 60 adamnyń qatasýymen ótip jatqan úılený toıynyń ústinen tústi. Al, ekinshi úılený toıy «Arıstokrat» meıramhanasynda uıymdastyrylǵan. Mundaǵy toıǵa 50 adam qatysqan. Karantın talaptaryn buzýshylarǵa qatysty materıaldar Aqmola oblysynyń sanıtarlyq-epıdemıologııalyq baqylaý departamentine joldandy», - dedi vedomstvodan.

Jalpy jyl basynan beri óńirdegi monıtorıngtik toptar karantın talaptaryn saqtaý boıynsha ártúrli menshiktegi 26397 nysandy tekserdi. Onyń ishinde 569 nysanda karantın talaptary buzylǵandyǵy anyqtaldy. 604 ákimshilik aıyppul salynsa, onyń ishinde jalpy somasy 80 mıllıon 429 myń 860 teńge quraıtyn 588-i qaraldy. Sottarǵa qaraý úshin 14 materıal joldandy.

«Aqmolalyqtardy sanıtarlyq-epıdemıologııalyq normalardy qatań saqtaýǵa, betperde kııýge, adamdar kóp jınalatyn jerlerge barmaýǵa shaqyramyz. Sonymen qatar, koronavırýspen kúresý úshin karantındi saqtaý jetkiliksiz, halyqty jappaı vaktsınatsııalaý arqyly ujymdyq ımmýnıtetti qalyptastyrý mańyzdy», - dep tolyqtyrdy vedomstvodan.