Karantın kezindegi Oraza: Qandaı saqtyq sharalaryn eskerý kerek

NUR-SULTAN. QazAqparat – Qazaqstannyń bas memlekettik sanıtarlyq dárigeri Aıjan Esmaǵambetova Ramazan aıy kezinde koronavırýs ınfektsııasyn juqtyryp almaý úshin halyqqa birshama keńes berdi, dep habarlaıdy QazAqparat tilshisi.

«24 sáýirden bastap qasıetti Ramazan aıy bastalady. Osy rette koronavırýs ınfektsııasynyń aýa, tamshy arqyly taralatynyn eske salǵym keledi. Adammen jaqyn baılanysta bolǵan ýaqytta, túshkirý nemese jótelý, áńgimelesý kezinde, gıgıenany saqtamaı vırýs juqqan zattardy ustaǵanda da koronavırýs juǵýy múmkin. Ramazan aıynda ádette adamdar toptasa jınalyp, bir-birine qonaqqa barady. Alaıda bıylǵy jyl – ózderińiz kórip otyrǵandaı erekshelenip otyr. Sebebi bárimiz de qazir indetke qarsy kúresip jatyrmyz. Sol sebepti Ramazan aıynda da bizge koronavırýstyń aldyn alýǵa, jınalmaýǵa týra keledi», - dedi Aıjan Esmaǵambetova OKQ-da onlaın rejımde ótken baspasóz máslıhatynda.

Onyń aıtýynsha halyq arasynda koronavırýs ınfektsııasynyń taralýyna jol bermeý úshin Densaýlyq saqtaý mınıstrligi ózara qarym-qatynasty azaıtyp, adamdardyń jınalmaýyna, shaqyrǵan aýyzasharǵa, meshitke barmaýǵa keńes beredi.

«Oraza ustaǵan kezde de abaı bolý kerek. Máselen jasy kelip qalǵan nemese aýrýy bar azamattar saqtanbasa koronavırýs ınfektsııasynyń aýyr túrin juqtyryp alýy múmkin. Aǵzaǵa aqýyz ben maılar, vıtamınder jetkilikti dárejede kelmese – ımmýnıtettiń álsireýine ákep soǵýy múmkin. Artynsha ımmýnıtet álsiregen kezde adam ınfektsııany tez qabyldaýy múmkin. Sol sebepti oraza ustaǵysy keletin azamattar tamaqtyń tolyqqandy ratsıonyn tutynýy tıis», - dedi ol.

Qazaqstannyń bas memlekettik sanıtarlyq dárigeri budan buryn aıtyp júrgenindeı azamattardy úıde bolýǵa, koronavırýstyń aldyn alý erejesin saqtaýǵa shaqyrdy.