Karantın kezinde toıdy uıymdastyrýshylar men oǵan qatysqandar birdeı jaýapty - mınıstr
19:21, 30 Naýryz 2020
NUR-SULTAN. QazAqparat – Karantın tártibin buzǵan toıdy uıymdastyrýshylar men oǵan qatysqan qaýymnyń zań aldynda jaýapkershiligi birdeı. Bul týraly QR Ádilet mınıstri Marat Beketaev málim etti, dep habarlaıdy QazAqparat tilshisi.
Ákimshilik quqyq buzýshylyq kodeksiniń 476-babyna toqtalǵan mınıstr, «Atap aıtqanda, bul turǵyda toıdy uıymdastyrýshylar da, sondaı-aq oǵan qatysýshy da karantın tártibin buzǵany úshin birdeı jaýapty. Osy oraıda 26 myń teńge somasynda aıyppul nemese 15 týálikke deıin ákimshilik qamaýǵa alý eskerilgen», - dedi.
Onyń sózine qaraǵanda, sot túrli jaǵdaıdy nazarǵa alady jáne tártip buzǵandarǵa túrli sanktsııalar qoldana alady.
Budan buryn habarlanǵandaı, QR Ádilet mınıstri Marat Beketaev kúsheıtilgen karantın rejimindegi jańa mindetterge qatysty pikir bildirdi.