Karantın kezinde tabysynan aıyrylǵandarǵa saqtandyrý statýsy berildi

ALMATY. QazAqparat – Tabysynan aıyrylǵan azamattar MÁMS paketindegi qyzmetterdi tolyq paıdalanady. Bul týraly Almaty qalasy «Áleýmettik medıtsınalyq saqtandyrý qory» KEAQ fılıalynyń dırektory Tileýhan Ábildaev onlaın brıfıng barysynda aıtty, dep habarlaıdy QazAqparat tilshisi.

«Sońǵy kezde kóktemgi karantın kezinde aqysyz eńbek demalysyna ketýge májbúr bolǵan adamdardyń da statýstan aıyrylyp qalǵany týraly kóp aıtylyp júr. Keshe Úkimet osyndaı azamattarǵa jeńildik berý týraly sheshim qabyldady. Qor olarǵa avtomatty túrde saqtandyrý statýsyn berdi», - dedi Tileýhan Ábildaev.

Osylaısha, indet kezinde tabysynan aıyrylǵan azamattar MÁMS paketindegi qyzmetterdi tolyq paıdalanýǵa múmkindik aldy.

«Olar: sońǵy 3 aıda joq degende bir ret jarna tólegen, bereshegi eki aıdan aspaıtyn jaldamaly jumysshylar, oǵan qosa sońǵy 3 aı boıy qatarynan tólem jasaǵan, jarna qaryzy eki aıdan aspaıtyn jeke kásipkerler, jeke menshik notarıýstar, jeke menshik sot oryndaýshylary, advokattar. Memleket tarapynan saqtandyrylǵan, biraq 42500 teńge alý úshin biryńǵaı jıyntyq tólem tólep, Eńbek jáne halyqty áleýmettik qorǵaý mınıstrliginiń áleýmettik statýsy bar turǵyndar tiziminen shyǵyp qalǵandar da osy tizimde», - dedi ol.

Esterińizge sala ketsek, turǵyndar saqtandyrý júıesindegi mártebesin Telegramm jelisindegi bot (Saqtandyrubot) arqyly, sondaı-aq, Qoldau 24/7 mobıldi qosymshasy men Egov elektrondy úkimet portalyndaǵy jeke kabınet arqyly anyqtaı alady.