Karantın: Qandaı sportshylar sheteldegi jarystarǵa bara alady

NUR-SULTAN. QazAqparat – Mádenıet jáne sport mınıstri Aqtoty Raıymqulova Qazaqstan aýmaǵynan tys sporttyq saıystarǵa qatysý úshin qaı sportshylarǵa shetelge shyǵýǵa ruqsat beriletinin aıtyp berdi, dep habarlaıdy QazAqparat tilshisi.

«Vedomstvoaralyq komıssııanyń 13 qazandaǵy hattamalyq sheshimi negizinde «Astana» prezıdenttik basketbol klýbynyń múshelerine VTB Birikken Lıgasynyń chempıonatyna qatysý úshin elden shyǵyp, qaıta oralýǵa ruqsat etiledi. Bul sheshim VTB Birikken lıgasynyń chempıonat matchtary kezinde sanıtarlyq-epıdemıologııalyq is-sharalardy ótkizý tártibin ázirlegenin eskere otyryp qabyldandy», - dedi Aqtoty Raıymqulova OKQ-da ótken brıfıngte.

Onyń aıtýynsha, mundaı sporttyq is-sharalardan bas tartqan jaǵdaıda komandany chempıonatqa qatysýshylar qatarynan shyǵaryp jiberýi múmkin.

«Qazaqstannyń fýtboldan ulttyq quramasy týraly: qazirgi ýaqytta ÝEFA-da Qazaqstannyń úsh ulttyq quramasy oınaıdy. Olar: Qazaqstannyń ulttyq quramasy, 21 jasqa deıingi jastar quramasy jáne Qazaqstannyń áıelder quramasy. Búgingi tańda atalǵan komandalardyń matchtarǵa qatysý kestesi jasaldy. Sondaı-aq, ÝEFA talaptaryna sáıkes, Qazaqstan quramasy birqatar joldastyq kezdesýler ótkizýi kerek, áıtpese reglamentke sáıkes aıtarlyqtaı shekteýge ushyraıdy. Vedomstvoaralyq komıssııa hattamasynyń 20 shildedegi sheshimine sáıkes, 2020 jylǵy qyrkúıekten jeltoqsanǵa deıin ÝEFA Ulttar lıgasynyń matchtaryna qatysý úshin ulttyq, jastar jáne áıelder quramasyna ÝEFA-nyń Ulttyq lıgasynda jáne jastar arasyndaǵy Eýropa chempıonatyna qatysý maqsatynda elden kirip, shyǵýǵa ruqsat etilgen», - dedi mınıstr.

Aqtoty Raıymqulova bul rette sportshylardyń densaýlyǵyna basa mán beriletinin jetkizdi.

«Barlyq týrnırler kórermenderdiń qatysýynsyz ótedi, tek sportshylar oınaıdy. Bul - búkil álemdegi tájirıbe. Ózderińiz biletindeı, Olımpıada oıyndaryn, Álem chempıonattary men Eýropa chempıonattaryn bir jyldan az ýaqyttyń ishinde ótkizý josparlanǵan. Bizdiń sportshylardyń ol saıystarǵa qatysýy, olardyń sporttyq formada bolýy asa qajet. Sondyqtan barlyq táýekelderdi eskere otyryp, qajetti sharalardy normalarǵa sáıkes júzege asyryp, QR Vedomstvoaralyq komıssııa osy is-sharalarǵa qatysýǵa múmkindik berdi. Biz ózimiz barlyq normalardyń saqtalýyn qadaǵalaımyz», - dedi ol.