Karantın: Birqatar kásipkerdiń jumysyna ýaqytsha tyıym salyndy

NUR-SULTAN. QazAqparat – Elorda soty karantın rejımin jıi buzǵan 36 kásipkerlik sýbektisiniń jumysyna ýaqytsha tyıym saldy. Bul týraly Nur-Sultan qalasynyń bas memlekettik sanıtarlyq dárigeri Sarhat Beısenova aıtty, dep habarlaıdy QazAqparat tilshisi.

«Osy jyldyń 1 qańtary men 14 aqpany aralyǵynda sotqa 47 kásipkerlik sýbektisine qatysty 52 ákimshilik is sotqa jiberildi. Olar: «Sova», «Janym Soul» karaoke-bary «Alanya» túngi klýby, «Eho» bary, «Zoloto» meıramhanasy, «Stories» laýndj-bary, «Tekıla» dámhana-bary, «Respawn» kompıýterlik klýby», - dedi bas sanıtarlyq dáriger elorda ákimdiginde ótken brıfıng barysynda.

Onyń dereginshe, sot 36 kásipkerlik sýbektisine qatysty 6 mln teńge mólsherinde ákimshilik jaýapkershilikke tartý týraly sheshim qabyldaǵan. Sonymen qatar atalǵan nysandardyń jumysyna 1aıdan 3 aıǵa deıin tyıym salyndy.

«Máselen, «Janym Soul» karaoke-baryna 70 AEK aıyppulmen 1 aıǵa, «Alanya» túngi klýby 100 AEK-pen 3 aıǵa jumysy toqtatyldy. «Tekıla» karaoke-baryna 170-200 AEK mólsherinde 4 ákimshilik aıyppul salyndy jáne 1 aı jumys isteı almaıdy. «Zolota» meıramhanasy da jumysyn bir aıǵa toqtatty jáne 100 AEK kóleminde aıyppul tóleıdi. «Respawn» kompıýterlik klýb 5 AEK aıyppul tólep, 2 aı jumys isteı almaıdy. «Aq qaıyń» saýnasyna da 5 AEK mólsherinde aıyppul tóledi. Onyń da jumysyna 1 aıǵa tyıym salyndy», - dedi Sarhat Beısenova.

Bas sanıtarlyq dárigerdiń atap ótýinshe, sot uıǵarymyn oryndaý úshin 13 kásipkerlik sýbektisiniń esikteri mórlengen. Sonmen qatar «Tekıla» karaoke-bary men «Alanya» túngi klýbyna elektr energııasy men sý berý toqtatylǵan.