Karantın: 30 naýryz ben 5 sáýir aralyǵynda bankter qalaı jumys isteıdi
13:06, 29 Naýryz 2020
NUR-SULTAN. QazAqparat - Nur-Sultan men Almaty qalalarynda 30 naýryzdan 5 sáýirge deıin ekinshi deńgeıli bankter jumysyn toqtatady. Bul týraly QazAqparat QR Ulttyq bankke silteme jasap habarlaıdy.
Atalǵan merzim aralyǵynda Nur-Sultan men Almatyda ornalasqan ekinshi deńgeıli bankterdiń kassalyq-eseptik bólimderiniń jumysy toqtatylady.
Osy ýaqyt aralyǵynda zańdy jáne jeke tulǵalardan tólem qabyldaý jáne aqsha aýdarý ınternet, mobıldi bankıng arqyly qashyqtyqtan júzege asyrylady.
Qolma-qol aqshany alýǵa, qolma-qol aqshasyz esep aıyrysýǵa jáne jeke tulǵalardyń banktik shottaryn toltyrýǵa arnalǵan bankomattar men termınaldardyń jumys isteýin bankter ádettegideı qamtamasyz etedi.
«Qazaqstan Respýblıkasy Ulttyq bankiniń Qazaqstandyq bankaralyq esep aıyrysý ortalyǵy» RMK bankterdiń, qazynashylyq komıtetiniń jáne naryqtyń basqa qatysýshylarynyń tólemderin óńdeýdegi jumysy shtattyq rejımde júzege asyrylady.