Qaramaǵyndaǵy qyzmetshi jemqorlyqqa urynsa, onda basshy qyzmetinen ketýge daıyn bolýy tıis - A.Kravchenko

ASTANA. QazAqparat - Memlekettik organ basshysy qaramaǵyndaǵy qyzmetshisi jemqorlyqqa urynsa, qyzmetinen ketýge daıyn bolýy tıis. Bul pikirdi «KTK» telearnasynyń «Halyq qyzmetshisi» baǵdarlamasyna suhbat bildirgen QR Bas prokýrorynyń orynbasary Andreı Kravchenko bildirdi.

«Kináli bolsa da, bolmasa da qaramaǵyndaǵy qyzmetker jemqorlyqpen ustalsa, onda kez kelgen basshy óziniń otstavkaǵa ketýge daıyn ekendigin málimdeý tıis. Odan keıin sáıkesinshe, tekserý amaldary ony laýazymynan bosatý-bosatpaýdy anyqtaı jatar. Menińshe, bul - barynsha mańyzdy. Bul - memlekettiń jemqorlyqqa qarsy saıasatynyń mańyzdy bir bólshegi», - dedi ol.

Onyń aıtýynsha, búgingi tańda elimizde jemqorlyqqa qatysy bolǵan memlekettik qyzmetshiniń memlekettik qyzmetke qaıtyp oralýyna jol joq.

«Osyndaı jaıttar oryn alǵany anyqtalsa, onda ol jarııa etilip, memlekettik qyzmetimen ol adam birden qosh aıtysady», - dedi Andreı Kravchenko.