Qaraly qańtar: Taldyqorǵandaǵy jappaı tártipsizdiktiń beınehronologııasy jarııalandy

NUR-SULTAN. QazAqparat – Áleýmettik jelide Taldyqorǵandaǵy tártipsizdiktiń beınehronıkasy paıda boldy, dep habarlaıdy QazAqparat tilshisi.

Vıdeonyń basyndaǵy kadrlarda «5 qańtar kúni saǵat 10.00-de Taldyqorǵan qalasy polıtsııa basqarmasy ǵımaratynyń aldyna 200-ge jýyq adam ákimshilik qamaýǵa alynǵandardy bosatý talabymen jınaldy» degen jazý bar.

Odan keıingi kadrda bul saǵat 14.30-daǵy oqıǵalar ekeni aıtylady. «Taldyqorǵan qalasy polıtsııa basqarmasy ǵımaratynan sherýshilerdi yǵystyrý» dep jazylǵan.

Vıdeodan oqıǵanyń birtindep ýshyqqanyn kórýge bolady. Kadr betindegi jazý ártúrli ýaqytta shamamen 3000 sherýshiniń polıtsııa qyzmetkerlerine shabýyldaǵanyn aıtady.

Odan keıingi kadrlarda Almaty oblystyq ákimdigine jasalǵan shabýyl kórsetilgen.

Kelesi kadrda qalyń toptyń ákimdik ǵımaratyna, áskerı jáne polıtsııa qyzmetkerlerine shabýyl jasap jatqany kórsetiledi.

Taǵy bir sátte Almaty oblysy ákiminiń orynbasaryn birneshe adamnyń oqıǵa ortasynan qorǵashtap, shyǵaryp bara jatqanyn kórýge bolady.

Polıtsııa kólikterin tóńkerý, qıratý kadrlary alańdaǵy Nursultan Nazarbaev eskertkishin qulatqan sátke ulasady.

Odan keıingi kadrdyń betindegi jazý «5 qańtar, saǵat 17.40» dep berilgen. Bul kezde Ulttyq qaýipsizdik komıteti depatamenti ǵımaratyna shabýyl jasalǵany aıtylady.

«5 qańtar saǵat 19.48» dep tańbalanǵan kadrda Almaty oblysy polıtsııa departamentine shabýyl jasalǵan sátter kórsetilgen.

«7 qańtar saǵat 11.37» dep belgilengen kadrǵa tergeý ızolıatoryna qalaı shabýyl jasalǵany túsip qalǵan.

Vıdeodan shep quryp alǵan birneshe belgisiz adamnyń ǵımaratqa oq jaýdyryp jatqany, jaralanǵan jaqtastaryn qutqarmaq bolǵan áreketteri kórinedi.