Qaraly qańtar: Quqyq qorǵaý organdary sheteldik dıplomatııa korpýsyn tergeý barysymen tanystyrdy

NUR-SULTAN. QazAqparat - Qazaqstannyń Syrtqy ister mınıstrliginde elde akkredıttelgen sheteldik dıplomatııalyq korpýstyń ókilderine QR Bas prokýrorynyń orynbasary Bolat Dembaev pen QR Іshki ister mınıstriniń orynbasary Qaırat Sóntaevtyń qatysýymen qańtar aıyndaǵy oqıǵalardy tergeý barysy týraly birlesken brıfıng ótti, dep habarlaıdy QazAqparat.

Vedomstvonyń málimetinshe, spıkerler brıfıngke qatysýshylarǵa qylmystyq isterdi obektıvti tergeýdi qamtamasyz etý jáne ustalǵan azamattardyń quqyqtaryn qorǵaý úshin qabyldanyp jatqan sharalar týraly egjeı-tegjeıli aqparat berdi.

Shara barysynda qańtar oqıǵalarynyń derekti kadrlary kórsetildi.

Dıplomattardyń nazary oqıǵalardyń hronologııasyna jáne qylmystyq toptardyń, ekstremısterdiń jáne terrorısterdiń qatysýymen beıbit mıtıngti bılikti basyp alý áreketin qamtyǵan olardyń erekshe gıbrıdti formasyna aýdaryldy.

Tergeý is-áreketteri barysynda ustalǵan azamattardyń zańdy quqyqtary men bostandyqtaryn qorǵaý úshin qabyldanatyn sharalarǵa kóńil bólindi.

Adam quqyqtarynyń yqtımal buzylýy týraly, onyń ishinde BAQ-ta jarııalanatyn barlyq habarlamalardy prokýratýra organdary tekseredi.

«Árbir fakt tıisti quqyqtyq baǵa berýimen muqııat tekseriledi», – dep atap ótti B. Dembaev.

Bul máselede QR Adam quqyqtary jónindegi ýákilimen, Azaptaýlardyń aldyn alý jónindegi ulttyq aldyn alý tetiginiń qatysýshylarymen, Ulttyq qoǵamdyq senim keńesimen tyǵyz ózara is-qımyl jasalǵany atap ótildi.

«Olardyń yqtımal qatygez qarym-qatynas jaǵdaılaryn jáne medıtsınalyq kómek kórsetpeý faktilerin tekserý maqsatynda ızolıatorlarǵa baryp, ustalǵan adamdarmen kezdesýge tolyq ruqsaty bar» dep kórsetildi.

Іs-shara sońynda Bas prokýratýra men ІІM ókilderi brıfıngke qatysýshylardyń suraqtaryna jaýap berdi.

Sheteldik dıplomattar tergeý is-sharalary týraly mazmundy aqparat alý múmkindigi úshin alǵys aıtyp, qańtar oqıǵalaryna obektıvti tergeý júrgizýge baǵyttalǵan sharalardy qoldady.

Sondaı-aq, brıfıngke beınebaılanys arqyly Qazaqstan Respýblıkasynyń sheteldik mekemeleriniń basshylary qatysty.