Qaraquıryq atqan brakonerler ustaldy

ASTANA. QazAqparat - Qyzylorda oblysy aýmaǵynda qaraquıryq atqan brakonerler ustaldy. Bul jaıynda QR AShM Orman sharýashylyǵy jáne janýarlar dúnıesi komıtetiniń baspasóz hatshysy Sáken Dildahmet Feısbýktegi paraqshasynda jazdy, dep habarlaıdy QazAqparat.

«2018 jylǵy 14 sáýirde tańǵy saǵat 04:00 shamasynda Qyzylorda oblystyq orman sharýashylyǵy jáne janýarlar dúnıesi ınspektsııasynyń ınspektorlary «Ohotzooprom» ÓB» RMQK-nyń Qyzylorda óńirlik fılıalynyń ınspektorlarymen birlesken reıdtik shara barasynda Qyzylorda oblysy Shıeli aýdanynyń aımaǵynda «ÝAZ» markaly avtokólik  mingen brakonerlerdi ustady», - dep jazdy ol.

Onyń jazýynsha, avtokólikti tekserý barysynda 1 qaraquıryqtyń týshasy, qujaty joq 2 patrony bar 16 kalıbrli ańshy myltyǵy jáne 38 patronymen optıkalyq dáldigi bar «Vepper» myltyǵy tabylǵan.

«Oqıǵa bolǵan jerge Shıeli AІІB-niń jedel toby shaqyryldy. Atalǵan fakt 2018 jylǵy 14 sáýirde SDTBT-de tirkelip, QR QK 337 babynyń 4 bóligimen qylmystyq is qozǵaldy», - dedi Sáken Dildahmet.

Foto: fhc.kz