Qaraqshylyq shabýyl jasady dep sottalǵan eki aqtóbelik aqtalyp shyqty

<p>AQTÓBE. KAZINFORM — Qaraqshylyq shabýyl jasap, sottalyp ketken eki aqtóbelik ózderiniń janynda taǵy eki adam bolǵanyn aıtyp, qylmystyq is tergeldi. 2019 jyly bastalǵan tergeýden soń byltyr taǵy 2 aqtóbelik 4 jyl 6 aıǵa bas bostandyǵynan aıyrylyp, búgin qaıta aqtalyp shyqty.</p>

Qylmystyq oqıǵa 2016 jyly boldy. Іs materıalyna súıensek, Aqtóbeniń 2 turǵyny jarnama saıtyndaǵy habarlama arqyly kólikti satyp alýǵa kelisip, kezdesýge barady.

Bir kúnnen soń kólikti qaıta qaraýǵa kelisip, olardyń jyljymaly múlikti satyp almaı, qaraqshylyq shabýyl jasaǵany belgili boldy. Quny 9 mln teńge bolatyn kólikti zańsyz ıemdenýdi maqsat etip, satýshy ákeli-balaly eki adamdy uryp-soǵady.

Osy qylmystyq isten soń A jáne B esimdi eki aqtóbelik sottalyp, 2016 jyly 10 jáne 12 jylǵa bas bostandyǵynan aıyrylady.

Arada 3 jyl ótkende, ıaǵnı, 2019 jyly bul oqıǵaǵa taǵy eki adamnyń qatysy bar ekenin aıtyp, polıtsııa tergeý júrgizedi. 

— Sot alqasy qylmystyq is materıaldaryn qaıta qarap, kýágerlerdi tyńdap sottalýshylardy aqtaý týraly uıǵarymǵa keldi. Tergeý kezinde Y jáne N esimdi eki sottalýshynyń kinási tolyq dáleldenbedi. Sonymen birge qylmystyq-protsestik zańnama talaptary saqtalmaǵan. Sot Aqtóbe oblystyq polıtsııa departamenti men Aqtóbe oblystyq prokýratýrasyna jeke qaýly shyǵardy, — dep habarlady Aqtóbe oblystyq sotynyń baspasóz qyzmeti. 

Aıta keteıik, Y jáne N esimdi eki aqtóbelik 2023 jyly 4 jyl 6 aıǵa bas bostandyǵynan aıyrylǵan.