Qarakólde qyrylǵan aqqýlar: Rixos Aktau-ǵa aıyppul salynýy múmkin

<p>ASTANA. KAZINFORM &mdash; Májilis depýtattaryna balyq sharýashylyǵyn damytýǵa arnalǵan zań jobasyn tanystyrǵan Ekologııa jáne tabıǵı resýrstar vıtse-mınıstri Nurken Shárbıev jıynnan keıin BAQ ókilderine Mańǵystaý oblysynda qyrylǵan aqqýlar jóninde pikir bildirdi.</p>

Jýrnalıster vıtse-mınıstrden aqqý qyrylǵan Qarakólge Rixos Aktau qonaqúıinen sarqyndy sýdyń tógilýi qanshalyqty zańdy ekenin surady.

«Rixos-ke kelsek, ruqsat etilgen normalardan aýytqýǵa jol berilgen. Synama alyndy, túpkilikti qorytyndysy keıin aıtylady. Bul máselemen ekologııa departamenti aınalysyp jatyr, solar shara qoldanady. Tekserý qorytyndysy shyqqanyna qaraı aıyppul, ákimshilik sharalar, sýdy tazartý jáne taǵy basqalar bolady. Jobalaý kezinde sýdy tazartý qarastyrylǵan. Qonaq úı salynǵan kezde jergilikti atqarýshy organ sý tógýge ruqsat bergen bolsa kerek», — dedi vıtse-mınıstr.

Sondaı-aq, ol 12 óli aqqýdyń denesinen 37 synama alynǵanyn atap ótti.

Sol synamanyń bári qustardyń ólimi qus tumaýynan bolǵanyn rastaǵan. 

«Bul jyl qustary ǵoı. Bul jerde sebep — taza qus tumaýy. Qyrylyp jatqan aqqýdyń bári eseıip úlgermegen. Ólgen qustar arasynda eresekteri joq. Basqa túrleri de joq. Jyl saıyn bul kólde 50 myń aqqý qystaıdy. Sodan qalǵan 18 myńnyń 4 myńdaıy ushyp ketken. Qazir 14 myńdaıy qalǵan. Keshegi málimet boıynsha qyrylǵan aqqý sany 1028-ge jetken. Sanıtarııalyq sharalardyń bárin saqtap jatyr. Dert úı qustaryna juqpas úshin aqqý qyrylǵan aýmaqqa adamdardy jibermeı jatyrmyz. Qańtardyń bas kezinde kúnine 100 qus óletin. Qańtardyń 9-10-yna qaraı 50 boldy. Qazir kún saıyn 25 qus ólip jatyr», — dedi Nurken Shárbıev.

Eske sala keteıik, Mańǵystaýda qyrylǵan aqqýlar sany myńǵa jýyqtady.

Aldyn ala málimet boıynsha, aqqýlardyń jappaı qyrylýy qus tumaýynyń órshýinen bolǵan. 

Keıin Qarakólge Rixos-ten tógiletin qaldyq sýdyń qanshalyqty las ekeni jarııalandy.