Qarakólde aqqýlardyń qyrylýyna qatty aıaz sebep bolýy múmkin

AQTAÝ. QazAqparat – Qarakólde óli tabylǵan aqqýlardyń barlyǵy áli bir jyl bolmaǵan jas, olar qatty aıazǵa shydamaǵan bolýy múmkin. Bul týraly​Mańǵystaý oblystyq aýmaqtyq orman sharýashylyǵy jáne janýarlar dúnıesi ınspektsııasynyń basshysy Ǵabbas Dosatov málim etti, dep habarlaıdy QazAqparat tilshisi.

Mańǵystaý oblystyq aýmaqtyq ınspektsııasynyń, «Ústirt» memlekettik tabıǵı qoryǵynyń qyzmetkerleri, Mańǵystaý oblysynyń ekologııa, veterınarııa ınspektsııasy jáne aýyl sharýashylyǵy basqarmasynyń mamandary, sondaı-aq «MAEK-Qazatomónerkásip» JShS ekologteri tekserý júrgizgen.

«Sarapshylar tekserý kezinde ólgen on aqqý tapty. Olardyń barlyǵy jas. Áli de qystyń sýyǵyna jaraıtyn maı jınap úlgermegen. Aldyn ala boljamdar boıynsha bul aqqýlar óliminiń birinshi sebebi bolýy múmkin. Sondaı-aq, taǵy bir faktor – óńirdegi qatty aıaz. Óıtkeni, Mańǵystaý oblysynda 1 jeltoqsannan bastap temperatýra -15 gradýsqa deıin tómendedi. Kaspıı teńiziniń jaǵalaýy men Qarakól kóline muz qatqan. Ol jas qustarǵa jem berýge qıyndyq týǵyzǵan», - dedi ol.

Ekologııa departamentiniń mamandary sýdan synamalar aldy, sondaı-aq veterınarııalyq ınspektsııa mamandary ólgen aqqýlarǵa taldaý jasady. Jınalǵan taldaý nátıjelerinen keıin qosymsha aqparat beriledi.

Aıta ketý kerek, aqqýdyń bul túri QR Qyzyl kitabyna enbegen.

Jalpy, jylyna Qarakól kólinde 10 000-ǵa jýyq aqqý qystaıdy.

Búgin Mańǵystaý oblysyndaǵy Qarakól kóliniń jaǵalaýynan óli aqqýlardyń tabylǵanyn jazǵan edik.

Vıdeodan alynǵan kadr