Qaraqııa turǵyndary Bozjyrada mádenı týrızmdi uıymdastyrýdy surap otyr

AQTAÝ. QazAqparat – Mańǵystaý oblysy Qaraqııa aýdanynyń júzge jýyq turǵyny aımaq basshysyna hat joldady. Onda jergilikti turǵyndar tabıǵatty qorǵaý úshin jáne halyqqa jumys ornyn ashyp, tabys tabýyna múmkindik berý úshin Bozjyra mańynda etnoaýyl salýǵa, rettelgen mádenı týrızmdi damytýǵa baǵyttalǵan sharalardy qolǵa alýyn surady, dep habarlaıdy QazAqparat tilshisi.

Senek aýylynyń aýmaǵynda ornalasqan Bozjyra shatqalyna týrısterdi qabyldaıtyn sapar ortalyǵy salynady degenge halyq aarsynda túrli pikir boldy.

Aýdan turǵyndarynyń aıtýynsha, ınvestorlar kelip, halyqpen kezdesken. Olar aýyldyń áleýmettik-ekonomıkalyq damýyna kóptegen múmkindik jasalatynyn aıtqan.

«Alaıda sońǵy kezderi, ásirese jabaıy týrızmnen mol paıda taýyp júrgender men basqa óńirden kelgen «ekologtar» jınalystar men áleýmettik jelilerde orynsyz baıbalam salyp, bul úmitimiz úzilýge aınaldy. Olar «tasjol tósep, Bozjyra qasynan (4 km jerden) týrısterdi qabyldaıtyn qonaqúı salyp, (rettelgen, mádenı, ekologııalyq) týrızmdi uıymdastyrý zııan keltiredi» dep halyqty sendirýge tyrysyp, arzan bedel jınap júr. Jabaıy týrızm Bozjyra alqaby men onyń mańyndaǵy jandy jáne jansyz tabıǵatty kúıretip bara jatqany olardyń oıyna kirip-shyǵatyn emes. Memleketke de, elge de, jerge de týrızmdi damytý arqyly paıda keltiretin osyndaı tabıǵat syıyn basqa jaqtaǵy «janashyrlar» emes, ózimiz qorǵaı alamyz. Mańǵystaýdaǵy Qaraman ata, Shopan ata, Shaqpaq ata, Sısem ata sııaqty qasıetti jerlerge kúnine ondaǵan adam zııarat etýge barady, alaıda barlyq qozǵalys rettelgendikten olardyń aınalasy tap-taza, ańy da, qusy da ornynda. Sol sııaqty ólkemizdegi búkil musylman álemine belgili, kıeli Beket ata jerasty meshitine jumys kúnderi 100-200 adam, al demalys kúnderi 100-150 avtokólikpen bes júzge deıin adam kelip, dál qasyndaǵy qonaqúıge túnep, zııarat etedi. Barlyq qozǵalys rettelgendigi sondaı, eshkim esh nársege zııan keltirmeıdi. Jan-jaǵy túgel kútimge alynǵan. Sondyqtan da meshit basyndaǵy úırengen arqarlar adamdarmen aralasyp júre beredi. Beket Ata basynda sizder de bolyp, osy aıtylǵandarǵa kózderińiz jetken bolar» delingen hatta.

Turǵyndar mádenı týrızm Bozjyradaǵy jaraly tabıǵat pen bezip ketken janýarlar dúnıesin dál osylaı qalpyna keltiretinine senemiz deıdi.

«Al júris-turys rettelmegen, týrıster emin-erkin baratyn Aıraqty, Aqmysh, Sherqala, Tamshaly, Saýra, Samal sekildi tabıǵat oryndary jyldan-jylǵa azyp bara jatqanyn Mańǵystaý halqy biledi. Sondyqtan ol jerlerde de mádenı týrızmdi uıymdastyrý qajet» delingen hatta.