Qaraqat Ábden: Jezqazǵan-Qaraǵandy jolynda adam qazasy azaımaı tur

<p>ASTANA. KAZINFORM &ndash; Májilis depýtat Qaraqat Ábden Premer-mınıstr Oljas Bektenovtiń atyna Qyzylorda-Jezqazǵan, Qaraǵandy-Jezqazǵan joldarynyń jaıyn depýtattyq saýal etip joldady.</p>

«Qyzylorda-Jezqazǵan, Qaraǵandy-Jezqazǵan tas joldarynyń «jyrynyń» taýsylatyn túri joq! Mysaly, qazir kóktem ýaqytynda qurylystyń naǵyz qyzatyn, ári qolaıly shaǵy. Jobalyq-smetalyq qujattamamen aınalysyp júrgende jol salýǵa qolaıly maýsym taǵy da ótip ketedi. 

Qyzylorda-Jezqazǵan jolynyń jaıy maǵan bala kezden tanys. Bul másele sol kezde ózekti edi, qarap tursańyz, qansha jyl ótse de, «baıaǵy jartas – sol jartas» bolyp tur. 

Depýtattyq saýalyma kelgen jaýaptyń barysy osyny ańǵartady. Máselen, «Jezqazǵan-Qyzylorda» avtomobıl joly boıynsha merdiger kompanııalardyń ótinimderi áli baǵalaný satysynda. Qujattardyń rásimdelýi «Gosekspertıza» men «QazAvtoJol» arasynda ary-beri «dopsha» domalap júr. Al «Jezqazǵan-Qaraǵandy» tas jolyna qatysty merdigerlik kompanııalardy anyqtaý áli josparlanyp jatqanǵa uqsaıdy. Demek, naqty iske qashan kóship, qurylystyń qashan bastalatyny belgisiz», - dedi depýtat.

Onyń sózine qaraǵanda, bul joldarǵa kúni qarap otyrǵan turǵyndar jergilikti ákimdiktiń jaıbasarlyǵyna narazy. 

«Biraq atalǵan baǵyttaǵy avtomobıl joldarynyń salynýy, baqylanýy oblysy ákimshiligi emes tikeleı Kólik mınıstrligine qaraıdy. 

Jezqazǵan-Qaraǵandy tasjoly «qandy jer» atalyp ketkeni barshaǵa aıan. Dál osy jolda 2023 jyly 129 jol kólik oqıǵasy tirkelip, 167 adam dene jaraqatyn alǵan, 37-si qaza tapqan. Al bıylǵy 2 aıda ǵana 23 jol kólik oqıǵasy oryn alyp, 37 adam jaraqattanyp, 2 adam mert boldy. Tas joldyń «jyry» taýsylǵansha, áli qansha jan taýqymet tartady?» - dep surady Qaraqat Ábden.

Májilis depýtaty Oljas Bektenovten Qyzylorda-Jezqazǵan, Qaraǵandy-Jezqazǵan tas joldarynyń keleshegine baılanysty naqtylanǵan jumys josparyn berýdi surady.

«Sondaı-aq jumys jospary boıynsha istiń talap etilýin qadaǵalaýdy nazarǵa alýdy suraımyz», - dedi ol.