Qaraqat Ábden sýıtsıdpen kúres jolyn usyndy

ASTANA. QazAqparat - Jezqazǵan qalasynda ótken arnaıy dóńgelek ústel barysynda Qaraqat Ábden «Sýıtsıdpen kúres jóninde ulttyq strategııalyq jospar» ázirleýdi usyndy, dep habarlaıdy QazAqparat.

Kandıdat ol úshin arnaıy vedomstvoaralyq komıssııa quryp, zańnamalyq talaptarǵa sáıkes Parlamenttik tyńdalymda atalǵan másele kóterilýi tıis dedi.

Jıynǵa psıholog mamandar men ıývenaldy polıtsııa organdarynyń ardagerleri, analar keńesi men ardagerler keńesiniń músheleri qatysty.

Kezdesýde 2018-2022 jyldar aralyǵynda 18 myńǵa jýyq adam óz-ózine qol jumsaǵany, 21 myńnan astam qazaqstandyq ózine qol salýǵa áreket etkeni týraly statıstıkalyq derek keltirildi. Belgili bolǵandaı, Qazaqstan óz-ózine qol jumsaý boıynsha alǵashqy 20 eldiń qatarynda bolsa, balalar men jastar arasyndaǵy sýıtsıd boıynsha elimiz álemde alǵashqy úshtikke kiredi.

Eske salsaq, elimizde 20 qarasha kúni kezekten tys prezıdent saılaýy ótedi. Úmitker Qaraqat Ábden el aımaqtaryn aralap, 11 qala men birneshe aýyldyq eldimekende 20-dan astam kezdesý ótkizdi Aldaǵy ýaqytta ol Qyzylorda, Soltústik Qazaqstan, Túrkistan, Jambyl oblystarynyń saılaýshylarymen kezdesý ótkizedi.