Qaraqat Ábden sıntetıkalyq esirtkiniń zardaby jaıly másele kóterdi

ASTANA. QazAqparat – QR Prezıdenti laýazymyna kandıdat Qaraqat Ábden áleýmettik jelidegi paraqshasynda ult bolashaǵyna qaýip tóndiretin másele – esirtki problemasy jaıynda oı bólisti, dep habarlaıdy QazAqparat.

Ol mamandardyń dabyl qaǵyp jatqanyna nazar aýdarady. Aıtýynsha, qazir ıne ustaǵan nashaqorlardyń emes, sıntetıkalyq esirtkiniń zamany. Arzan ári qoljetimdi bul esirtkiniń zardaby óte aýyr. Esirtkige táýeldi bolǵandardyń arasynda jastar kóp. Sıntetıkalyq esirtkini qoldanatyndardyń qatarynda tipti mektep oqýshylary da bar.

Іshki ister mınıstrliginiń málimeti boıynsha, polıtseıler zańsyz aınalymdaǵy 12 tonnaǵa jýyq esirtkini, sonyń ishinde onyń 212 kg sıntetıkalyq túrlerin tárkiledi. 36 esirtki zerthanasy men 43 esirtki kanaly joıyldy, esirtkilerdi jarnamalaıtyn 1 900 saıt buǵattaldy. Mınıstrlik nashaqorlyqqa jáne esirtki bıznesine qarsy úsh jylǵa arnalǵan Keshendi jospar ázirlep jatyr.

Eske salsaq, elimizde 20 qarasha kúni kezekten tys prezıdent saılaýy ótedi. Úmitker Qaraqat Ábden el aımaqtaryn aralap, 13 qala men birneshe aýyldyq eldi mekende 20-dan astam kezdesý ótkizdi. Aldaǵy ýaqytta ol Soltústik Qazaqstan, Túrkistan, Jambyl oblystarynyń saılaýshylarymen kezdesý ótkizedi.