Qaraqat Abden: Depýtat turmaq, aýdan ákimin kórmegen aýyldyqtar bar

ASTANA. QazAqparat – Shalǵaı jatqan aýyldarda ınternet, jol men aýyz sý máseleleri ózekti. Bul týraly Aqmola jáne Qaraǵandy oblystaryndaǵy aýyldarǵa baryp, halyqtyń jaı-kúıimen tanysqan Májilis depýtaty Qaraqat Ábden málim etti, dep habarlaıdy QazAqparat Palatanyń baspasóz qyzmetine silteme jasap.

Depýtattyń aıtýynsha, jaýyr bolǵan jol jáne ınternet máselesi Qaraǵandy oblysy Nura aýdanyndaǵy Janbóbek aýylyn aınalyp ótpegen.

«Shyny kerek, aýylǵa áreń jettik, jol joq. 455 adam turatyn aýyldan aýdanǵa deıin – 295 shaqyrym, al oblysqa deıin – 535 shaqyrym. Kúre joldan shalǵaı jatqan aýyldan jazdygúni áreń qatynaıtyn turǵyndar, qysta tipti qamalatyny anyq. Jańa tehnologııa, qoljetimdi elektrondy qyzmet kórsetý – aýyl turǵyndary úshin tańsyq uǵymdar», - deıdi Q. Ábden.

Sonymen qatar, depýtat atalǵan aýyl ınternetten de tys qalǵanynyn atap ótip, jol taýqymetinen bólek, uıaly baılanystyń joqtyǵy da turǵyndardy áýre-sarsańǵa salatynyna nazar aýdardy.

«Ákimniń aıtýynsha, buǵan qarajat bólinbegen. Kórshi jatqan aýyl Taldysaıdan ınternet jelisin tartyp, eń bolmaǵanda úıde qoldanýǵa bolatyndaı jaǵdaı jasaýǵa bolady. Aldaǵy ýaqytta bul suraqty tıisti organdarmen birlesip, shamam jetkenshe sheship berýge ýáde berdim», - dedi depýtat.

Halyqtyń turmys-tirshiligimen etene tanysqan depýtat halyqty jaryq máselesi de alańdatatyp otyrǵanyn aıtty.

«Aýyldaǵy jaryq baǵanalary qulaıyn dep tur, symdar da eskirgen. Ákimdik pen tıisti jaýapty organdar bul máseleni jiti baqylaýǵa alyp, tez arada sheshimin tabýy kerek dep sanaımyn», - dedi ol.

Sapar barysynda depýtat Qaraǵandy oblysy Nura aýdanyndaǵy Qulanótpes aýylynyń turǵyndarymen kezdesti. Bul aýyldyń turǵyndary taıaýda ózderiniń talap-tilekterin aıtyp, depýtatqa hat joldaǵan. Aýdan ortalyǵynan 220 km, oblystan 525 km shalǵaı jatqan bul aýylda 355 adam turady.

«Halyqty tolǵandyrǵan negizgi másele – taza aýyz sý, sapaly jol, qoljetimdi baılanys. Ásirese, sý máselesin basty nazarǵa aldym. Sebebi, buǵan bıýdjetten qyrýar qarjy bólingen. «Life Story Invest» JShS merdigerlik uıymymen, «Kazahstanskıe tehnologıı» JShS qosalqy merdigerlik uıymymen shart jasaldy. Tenderge qatysýǵa kelgende bilek sybana kirisken merdigerler iske kelgende baıaý qımyldap, halyqtyń ashýyna tıip otyr. Máseleniń anyq-qanyǵyn óz kózimmen kórý úshin merdigerlermen kezdestim. Kezdesýge aýdan ákimi, jergilikti máslıhat depýtattary da qatysty. Áńgime barysynda eki taraptyń aıtqany bir-birine sáıkes kelmegen soń, qazba jumystary bolyp jatqan jer ýchaskesine arnaıy bardym», - dedi depýtat.

Qaraqat Ábden atap ótkendeı, merdiger merziminen keshigip jatyr. Maýsym aıynan beri 15 shaqyrym jerdiń tek 500 metr bóligi ǵana qazylǵan. Dalada tek 1 tehnıka ǵana jumys istep tur. Jazdyń bel ortasy boldy, bul qarqynmen qar túskenge deıin úlgermeýi de múmkin. Dabyl qaqqan halyqtyń da, máslıhat depýtatynyń da shaǵymy ábden oryndy. Depýtattyń aıtýynsha, osyndaı kúrdeli máselelerdi aýdan ákimderinen bólek, oblys ákimderi men olardyń orynbasarlary qadaǵalaýǵa tıis. Shalǵaı aýyldarǵa oblys ákimderiniń orynbasarlary bara bermeıtini anyq. Osy atalǵan suraqtardy depýtat baqylaýyna alyp, jiti qadaǵaılaıtynyn jetkizdi.

«Aýyldardyń jaǵdaıy máz emes. Turǵyndardy tyndasań, jylaǵyń keledi. Qarapaıym halyq shydamdy ǵoı. Qýantatyny – aýyldyqtardyń partııamyzǵa senimi zor. Shalǵaı ornalasqan aýyldarǵa baryp, jaǵdaıymen tanystym. Osy ýaqytqa deıin Májilis depýtaty turmaq, aýdan ákimin kórmegen shalǵaı aýyldar bar», - dep jetkizdi Qaraqat Abden.