Qaraqalpaqstanda Amal merekesi toılandy

NÓKІS. QazAqparat - Ájinııaz atyndaǵy Nókis memlekettik pedagogıkalyq ınstıtýtynda qazaq halqynyń ulttyq merekeleriniń biri - Amal merekesi nemese Kórisý kúnine arnalǵan «Amal – jyldyń jarshysy» taqyrybynda ádebı-kompozıtsııalyq merekelik kesh ótti, dep habarlaıdy QazAqparat.

Ózbekstan – kóp ultty memleket. Qazirgi kezde elde birligi jarasqan 130-dan asa túrli ult ókilderi ómir súrýde.

Árbir ult ókilderi Naýryz merekesi qarsańynda óz halqynyń salt-dástúri, ádet-ǵurpyn pash etetin mádenı, ádebı is-shara uıymdastyrýda.

Ulystyń uly kúni, jańa jyl, jańa kúnniń bastaýy retinde belgilenetin Amal merekesi – kórisý kúni týysqan qazaq halqynyń ata-babalardan mura bolyp kele jatqan qundylyqtarynyń biri. Bereke men birliktiń sımvoly sanalǵan bul mereke kóp ultty Qaraqalpaqstan Respýblıkasynda da keń túrde atap ótiledi.

«Amal merekesi nemese Kórisý kúni – aǵaıyn-týystyń tatýlyǵy men halyqtardyń yntymaǵynyń aıqyn kórinisi», – deıdi ınstıtýttyń qazaq tili jáne ádebıeti kafedrasynyń meńgerishisi, dotsent Yrysty Quttymuratova.

Merekelik keshte ınstıtýttyń jastar máseleleri jáne rýhanı-aǵartýshylyq isteri jónindegi birinshi prorektory Qýandyq Qadyrov, Qazaqstan Respýblıkasy L.N.Gýmılev atyndaǵy Eýrazııa ulttyq ýnıversıteti qazaq ádebıeti kafedrasynyń meńgerýshisi, professor Qaıyrbek Kemeńger sóz sóıledi. Іs-sharada qolóner úlgileri, ulttyq taǵamdar, ulttyq kıimder kórmesi uıymdastyrylyp, talantly stýdentterdiń oryndaýyndaǵy án-kúı, bı, tusaýkesý, betashar sııaqty sahnalyq kórinister kórermender kóńilinen shyqty.

Islam Mátekov,Ájinııaz atyndaǵy Nókis memlekettik pedagogıkalyq ınstıtýtynyń baspasóz hatshysy.