Qaraǵaıdy jarty jyl keptiredi: Óskemendik qolónershi jasaǵan besikke suranys joǵary

<p>ÓSKEMEN. KAZINFORM &ndash; Óskemende turatyn Qaınar Qaırollauly aǵashtan túıin túıedi. Onyń jasaǵan besikteri men sandyqtaryna elimizdiń túkpir-túkpirinen tapsyrys beretinder kóp. Jýyqta qolónershimen jolyǵyp, suhbat quryp qaıtqan edik.</p>

- Aǵashtan túrli buıym-zattar jasap kele jatqanyńyzǵa qansha ýaqyt boldy?

- Bıyl jetinshi jyl. Bul – atamnan daryǵan óner. Atam óte daryndy sheber bolǵan. Óz qolymen jasaǵan kıiz úıdi aq patshaǵa syıǵa tartypty. Sol jaıly estip óstim. Boıdaǵy talant eshqashan tasada jatpaıdy eken. Bala kúnimnen sýret salǵandy jaqsy kóretinmin. Anam da oıý-órnekterdi ádemi salady. Soǵan qaraǵanda naǵashy jaqtyń óneri de qanyma sińdi. 

- Besikti qalaı jasaıtynyńyzǵa toqtalsaq. Qandaı aǵash qoldanasyz?

- Taza qaraǵaıdan jasaımyn. Ózime kerekti ólshemdegi taqtaılardy tildirip, kún tımeıtin kóleńkede keptiremin. Jarty jylǵa jýyq ýaqyt keptirilgen soń odan óte sapaly besik shyǵady. Al olaı istemese, tez jarylyp ketetin bolady. Sodan soń qurap, oıýyn salamyn. Barlyǵyn óz qolymmen isteımin. Eshqandaı apparat qoldanbaımyn. 

Foto: Keıipkerdiń jeke muraǵatynan

- Bir besikti jasaýǵa qansha ýaqyt ketedi?

- Besiktiń dızaınyna baılanysty. Negizi boıaýlaryna kóp ýaqyt ketedi. Onyń ótkir ıisi de bolady. Ortasha eseppen bir besikti 7-10 kúnde jasap shyǵamyn. Jalpy besiktiń balaǵa paıdasy zor. Besikke bólengen sábı tula boıy taza, uıqysy tynysh bolady. Denesi qurǵaq bolyp, syz darymaıdy.

- Taǵy qandaı zattar jasaısyz?

- Buryndary astaý jasaıtynmyn. Biraq ony isteıtinder kóp eken, sol úshin qoıdym. Qazir sandyq, teledıdar qoıatyn sóre, kıim ilgish, ústel, bóbekter otyratyn oryndyq jasap júrmin. Barlyǵy ulttyq naqyshta, oıýlarmen bederlengen. 

Foto: Keıipkerdiń jeke muraǵatynan

- Qandaı zattarǵa tapsyrys joǵary?

- Besikke. Shyǵys Qazaqstan men Abaı oblysynyń aýdandarynan bólek Ońtústik, Batys óńirlerden de tapsyrys jıi túsip turady. Odan keıin sandyqqa da suranys joǵary. Zattarymdy áleýmettik jelige salyp, sol arqyly jarnamalaımyn. Tapsyrys berip, jasaǵan dúnıemdi unatyp jatqandar basqalarǵa da aıtady. Sóıtip, klıentterim kóbeıip keledi. 

Foto: Keıipkerdiń jeke muraǵatynan

- Memleketten qandaı da bir grant aldyńyz ba?

- 2019 jyly qazirgi Abaı oblysy Borodýlıha aýdanynda turǵanmyn. Sonda «Atameken» kásipkerler palatasy arqyly 250 myń teńgedeı grant aldym. Qazir jumys isteımin degen adamǵa múmkindik kóp. Áleýmettik jelini de paıdalanǵan jón. Solaı óz jumysyńdy kórsete alasyń. Biraq árıne, demeýshiler tabylyp, qarjylaı qoldaý bildirilse qýanar edim. 

Foto: Keıipkerdiń jeke muraǵatynan

Keleshekte ózimniń dúkenim bolsa eken deımin. Maqsatym – Shyǵystyń brendin qalyptastyrý. Dinmuhamed Qonaevtyń «Qasyńa tabynýshylardan góri ıdeıa qosatyn adamdardy kóp jına» degen sózi bar. Brend jasaý úshin komanda jınap, ortaq maqsatqa jumyldyrsam deımin. Ulttyq naqyshtaǵy zattardy jasaý arqyly qazaqtyń salt-dástúrin, tarıhyn nasıhattaǵym keledi. Aıta bersem, maqsattarym az emes. Solarǵa jetý úshin shamam kelgenshe talaptanyp júrmin. 

Foto: Keıipkerdiń jeke muraǵatynan

- Áńgimeńizge raqmet!