Qaraǵandynyń «Shahter» fýtbol klýby aýktsıonda 1 myń teńgege satylmaq

QARAǴANDY. QazAqparat - Qaraǵandyda kópjyldyq tarıhy bar «Shahter» fýtbol klýby satyp alý quqyǵymen senimdi basqarýǵa berý úshin, bar bolǵany 1 myń teńgege aýktsıonǵa shyǵaryldy, dep habarlady «QazAqparat» HAA tilshisi.

Qaraǵandyda Ortalyq kommýnıkatsııalar qyzmetinde ótken brıfıngte   oblystyń memlekettik aktıvter  jáne satyp alý basqarmasynyń basshysy Murat Kádekov qazirgi sátte satý aldyndaǵy daıyndyq jumystary júrip jatqanyn málimdedi.

 «Shahter» fýtbol klýby» AQ-ny satý aldyndaǵy daıyndyq júrip jatyr - bul baǵalaýshyny anyqtaý boıynsha konkýrstyq protsedýralar ótkizý, baǵalaý boıynsha esepti usyný, veb-portalǵa salý úshin qujattar daıyndaý, tenderlik komıssııa otyrysyn ótkizý», - dedi Murat Kádekov.

Ol klýbtyń aýktsıondaǵy bastapqy quny bir myń teńge ekenin atap ótti. Bul rette, satyp alý quqyǵymen klýbty senimdi basqarýǵa alǵan tulǵa onyń 208 mıllıon teńge kólemindegi kredıtorlyq qaryzyn jabýy tıis bolady.

«Klýbtyń naqty quny 208 mıllıon teńgeni quraıdy», - dedi Murat Kádekov.