Qaraǵandynyń polıtseıleri Alǵys aıtý kúni kópbalaly otbasylarǵa kómek kórsetti

QARAǴANDY. QazAqparat – Alǵys aıtý kúni merekesinde Qaraǵandy oblystyq Polıtsııa departamentiniń bólimsheleri birqatar qaıyrymdylyq sharasyn uıymdastyrdy, dep habarlaıdy QazAqparat tilshisi.

Bul mereke kúni Jezqazǵan qalasy polıtsııa basqarmasynyń qyzmetkerleri Márýa Qulysheva atyndaǵy balalar úıiniń tárbıelenýshilerin quttyqtady. Jezqazǵan polıtseıleri atalmysh mekemeni qurylǵan sátten bastap qamqorlyǵyna alǵan. Kóptegen jyldar boıy quqyq qorǵaý organdary men ata-anasynyń qamqorlyǵysyz qalǵan balalar arasyndaǵy yntymaqtastyq odan ári nyǵaıa túsýde.

Ár mereke qarsańynda balalardy ózderiniń qamqorshylaryn asyǵa kútedi, olar mindetti túrde kelip, árqaısysyna syılyq beretinin de biledi. Al Alǵys aıtý kúni qarsańynda Jezqazǵan qalasynyń PB jeke quramy balalar mekemesiniń aýmaǵyn jınastyryp, aýlasyn qardan tazartty. Balalar úıiniń basshylyǵy polıtseılerge olardyń qıyndyqtary men problemalaryn sheshýge árdaıym kómek kórsetetinderi úshin alǵys aıtty.

Jergilikti balalar úıiniń tárbıelenýshilerin Balqash qalasy polıtsııa bóliminiń qyzmetkerleri de nazardan tys qaldyrǵan joq. Olar balalarǵa qonaqqa kelip, ár búldirshinge tátti syılyqtar tabys etti.

Al Temirtaý qalasy PB Shyǵys polıtsııa bóliminiń ıývenaldy polıtsııa qyzmetkerleri, ádette, qıyn ómirlik jaǵdaıǵa tap bolǵan otbasylardaǵy profılaktıkalyq jumystarmen qatar olarǵa jan-jaqty kómek pen qoldaý kórsetedi.

Mereke kúni olar kópbalaly otbasyna syılyqtar men azyq-túlik alyp keldi. Tártip saqshylarynyń bul áreketi kámeletke tolmaǵan 4 balany asyrap otyrǵan 33 jasar áıel úshin naǵyz tosyn syı boldy. Ol polıtseılerge kórsetken qamqorlyǵy úshin shyn júrekten alǵysyn bildirdi.

Qyzmetkerler balalarmen áńgimelesip, turmystaǵy, qoǵamdyq oryndardaǵy qaýipsizdik erejelerin eske saldy. Balalarǵa tótenshe jaǵdaılarda ózin qalaı durys ustaý jáne qatelespeýdi bilýi óte mańyzdy, dep esepteıdi tártip saqshylary.