Qaraǵandynyń Oktıabr aýdany Álıhan Bókeıhan dep ataldy

QARAǴANDY. QazAqparat - Qaraǵandyda Oktıabr aýdanyna Álıhan Bókeıhannyń esimi berildi. «Alash» partııasy kóshbasshysynyń týǵanyna bıyl 155 jyl toldy, dep habarlaıdy QazAqparat Qaraǵandy oblysy ákimdiginiń saıtyna silteme jasap.

Qaraǵandylyqtardy kópten kútken tarıhı oqıǵamen qala ákimi Ermaǵanbet Bólekbaev quttyqtady.

– Aýdandy qaıta ataý – bul eń aldymen Álıhan Bókeıhannyń tarıhı qyzmetine, jalpy elimizdiń tarıhyna berilgen qurmet. Aýdannyń ataýy ǵana emes, kelbeti de ózgeredi. Sońǵy birneshe jylda úılerdiń qasbetterin, shatyrlaryn, kireberis joldary men oramishilik joldardy jóndeý boıynsha úlken jumystar júrgizildi. Maıqudyq ortalyq jolyn aýqymdy qaıta qurý aıaqtaldy. Birneshe zamanaýı turǵyn úı keshenderiniń qurylysy júrip jatyr, shaǵyn aýdandarda jańa emhanalar iske qosyldy. Qaıta qurý jumystarynan keıin «Lıteışık» stadıony ashyldy. Alda áli talaı ózgerister bar, – dedi Ermaǵanbet Bólekbaev.

Aýdan 1938 jyly qalanyń soltústik bóliginde qurylǵan. 1961 jylǵa deıin Stalın dep ataldy. Sodan keıin ol Oktıabr dep ataldy. Onyń aýdany – 22,4 myń ga, halqy – 227 myń adam. Quramyna Maıqudyq, Prıshahtınsk, Suryptaý kiredi.

– Álıhan Bókeıhannyń «halyqtyń pikiri men erki – Zańnyń joǵary satysy» degen jaqsy sózderi bar. Táýelsizdik kúni qarsańynda Oktıabr aýdany Qazaqstannyń birligin, onyń bolashaǵyn jaqtaǵan adam – Álıhan Bókeıhan atyndaǵy aýdan bolyp qaıta ataldy dep maqtanyshpen aıtamyz, – dep atap ótti Qaraǵandy qalalyq máslıhatynyń hatshysy Qudaıbergen Beksultanov.

Álıhan Bókeıhanov 1866 jyly 5 naýryzda Semeı oblysy Qarqaraly ýeziniń Toqyraýyn bolysynyń aýylynda dúnıege kelgen. Ol memleket jáne qoǵam qaıratkeri, jýrnalıst jáne ǵalym, «Alash» ulttyq-demokratııalyq partııasynyń uıymdastyrýshysy jáne kóshbasshysy, sondaı-aq 1917 jyly Alash avtonomııasynyń tóraǵasy, Qazaqstan boıynsha Ýaqytsha úkimettiń komıssary boldy. Keıin ol «terrorıstik uıymǵa» qatysy bar degen aıyppen sottalyp, atyldy. 1989 jyly aqtaldy.