Qaraǵandylyqtar Qysqy Olımpıada oıyndaryna qatysýshylardy fleshmobtarmen qoldady

QARAǴANDY. QazAqparat - Qaraǵandy oblysynda «Qarly qys-2018» jáne «Aq qys-2018» dástúrli qysqy spartakıadalar bastaý aldy. Bıylǵy jyly jarystar Phenchhande ótetin Qysqy Olımpıada oıyndarynyń ashylýyna oraılastyryldy, dep habarlaıdy óńir basshysynyń resmı saıty. 

Spartakıadalardyń ashylý saltanaty 8 aqpanda «Aqjoltaı» Muz saraıynda ótti. Qysqy Olımpıada oıyndaryna arnalǵan muz ústinde ótken áserli shoýdy hokkeıshiler, konkımen júgirýshiler jáne mánerlep syrǵanaýshylar uıymdastyrdy. Merekelik sharanyń sharyqtaý shegi konkıshilerdiń aýqymdy fleshmoby boldy. 

Spartakıadalar baǵdarlamasyna tórt sport túri engizilgen: qysqy Prezıdenttik kópsaıys, shańǵy jarysy, doppen hokkeı, konkımen júgirý sporty. Jarystar úsh alańda ótedi: «Aqjoltaı» sport muz saraıy, QR Táýelsizdiginiń 10 jyldyǵy atyndaǵy qysqy sport túrleri boıynsha OBJSM shańǵy bazasynda, «Shahter» stadıonynda. Básekege oblystyń barlyq qalalary men aýdandarynan sportshylar qatysady - jalpy eseptegende 600-den astam adam. 

 Saıys qorytyndysy 9 aqpanda belgili bolady. Bul kúni «Shahter» stadıonynda spartakıadanyń jabylý saltanaty ótedi. Uıymdastyrýshylar sharanyń erekshe jarqyn bolatynyna ýáde berdi. Qysqy Olımpıada-2018 bastalýyna oraı taǵy bir fleshmob ótedi. Stadıonda qardan olımpıadalyq saqınalar qalanǵan. 

 Saran jastary qazaqstandyq olımpıadashylardy qoldap «Alǵa, Qazaqstan» fleshmobyn uıymdastyrdy. 

 Esterińizge sala keteıik, Qaraǵandy oblysynyń atynan Qaraǵandy quramasyna úsh konkımen júgirýshiler kirdi. Olar Ońtústik Koreıadaǵy Qysqy Olımpıada oıyndarynda elimizdiń namysyn qorǵaıtyn bolady. Olar - Ekaterına Aıdova, Stanıslav Palkın jáne Artem Krıkýnov.