Qaraǵandylyqtar karantınge qaramastan úılený toıyn ótkizip, bı keshine jınalǵan

QARAǴANDY. QazAqparat - Qaraǵandydaǵy «Farabı» meıramhanasynda mobıldi top 100 adamǵa jınalǵan toı ótip jatqanyn anyqtady, dep habarlaıdy QazAqparat tilshisi.

Qalada oıyn-saýyq oryndaryn, qoǵamdyq tamaqtaný nysandaryn, dúkenderdi jáne t.b. oryndardy tekserý jalǵasýda.

Reıd barysynda 10 qazanda Qazybek bı atyndaǵy aýdannyń mobıldi toby Qaraǵandy oblysynyń bas memlekettik sanıtarlyq dárigeri qaýlysynyń talaptaryn buzylǵanyn anyqtaǵan. Qaraǵandy qalasynyń S. Muqanov kóshesindegi 28/2-úıde ornalasqan «Farabı» meıramhanasynda 100 adam jınalǵan úılený toıy ótkizilgeni belgili boldy.

Meıramhana ıesine Ákimshilik quqyq buzýshylyq týraly kodekstiń 425-babynyń 1-tarmaǵy («halyqtyń sanıtarlyq-epıdemıologııalyq salaýattylyǵy salasyndaǵy zańnama talaptaryn, sondaı-aq gıgıenalyq normatıvterdi buzý) boıynsha hattama toltyryldy.

Atalmysh bapta «jeke tulǵalarǵa - 30 AEK mólsherinde (83 340 teńge); laýazymdy tulǵalarǵa, shaǵyn kásipkerlik sýbektilerine nemese kommertsııalyq emes uıymdarǵa - 230 AEK (638 940 teńge); orta kásipkerlik sýbektileri úshin - 310 AEK (861 180 teńge); iri kásipkerlik sýbektilerine - 1 600 aılyq eseptik kórsetkish (7 500 600 teńge) kóleminde aıyppul qarastyrylǵan.

Karantın rejımine qaramastan, Gogol kóshesindegi 86-úıde ornalasqan «Brýklın» restobarynda 11 qazanda keshke 200-ge jýyq adam bı keshine jınalǵan.

Oıyn-saýyq mekemesiniń karantın shekteýin buzǵany týraly materıaldar Qaraǵandy qalasynyń Qazybek bı atyndaǵy aýdanynyń TKQSQB-ǵa beriletin bolady.

Eske, sala ketsek, Qazybek bı atyndaǵy aýdanda alty mobıldi top jumys isteıdi.