Qaraǵandylyqtar haıýanattar baǵynda jańa týǵan qos alanǵa at qoıdy

QARAǴANDY. QazAqparat – Qaraǵandy haıýanattar baǵynda jańa týǵan jolbarys kúshikterine Sherhan men Shıva dep at qoıyldy. Bul týraly QazAqparat oblys ákimdigi saıtyna silteme jasap habarlaıdy.

Qaraǵandy haıýanattar baǵynda qala turǵyndarynyń kómegimen jańa týǵan jolbarystardyń esimderi tańdaldy. Jolbarys kúshikterine at tańdaýǵa barlyǵy 400 adam qatysty.

Qaraǵandylyqtar ártúrli ataýlardy usyndy – Han jáne Táńiri, Kara men Gandı, Barhan men Sahara, Lıýk pen Leıa jáne taǵy basqa.

«Kóp talqylaýdan keıin biz jolbarystardyń esimderin tańdadyq. Atalyǵynyń aty – Sherhan, al urǵashysynyń aty – Shıva. Jolbarystarǵa arnalǵan ataýlar baıqaýyna barlyǵy 400-den astam adam qatysty», - dep jazylǵag zoobaqtyń Instagram paraqshasynda.

Bul – Qaraǵandy haıýanattar baǵynda 15 jylda alǵash ret týǵan alandar. Maýsym aıynyń basynda Batyr men Mıa juby qos kúshikti boldy. Jolbarystarǵa at qoıý ýaqyty kelgende, haıýanattar baǵynyń basshylyǵy dástúr boıynsha turǵyndarǵa júginip, baıqaý jarııalady.