Qaraǵandylyqtar elordaǵa ashyq aspan astyndaǵy alleıa men sımvoldyq monýmentti syıǵa tartty

QARAǴANDY. QazAqparat - Astananyń 20 jyldyq mereıtoıyna oraı Qaraǵandy oblysy elordaǵa «Ulytaý» alleıasy men «Qazaq eline myń alǵys» monýmentin syıǵa tartty, dep habarlaıdy QazAqparat tilshisi.

Aspan astyndaǵy alleıanyń basynda boı kótergen 14 metrlik qola músin kompozıtsııasy - náýbet jyldary Qazaqstanǵa jer aýdarylǵan ártúrli ulttarǵa pana bolǵan qazaq halqynyń keń peıiliniń sımvoly.

«Alleıa ashyq aspan astyndaǵy mýzeı ispettes salynyp otyr. Onda Ulytaýdyń basty kórikti jerleri óz beınesin tabady. Syı retinde Ulytaýdyń tańdalýy tegin emes, ol - Qaraǵandy oblysyndaǵy eń tanymal tarıhı ári geografııalyq oryn», - deıdi Qaraǵandy oblystyq qurylys basqarmasynyń basshysy Talhan Qalmahanov.

Alleıanyń aty men Memleket basshysynyń Ulytaý týraly dáıeksózi jadeıt asyl tasyna qashap jazylǵan. Joba avtory - Qazaqstan Respýblıkasyna eńbek sińirgen sáýletker Serik Rústembekov.

«Alleıa 98 paıyzǵa daıyn. Onyń alańy 1,2 gektar keledi. Alleıa «Máńgilik el qaqpasy» men Túrkistan kósheleriniń ortasynda ornalasqan. Uzyndyǵy - 250 m, eni - 55 m. «Qazaq eline myń alǵys» monýmenti alleıanyń ortalyq alańynda, Túrkistan kóshesine qaraǵan bette boı kótergen», - deıdi T. Qalmahanov.

«Qazaq eline myń alǵys» monýmenti - 4 fıgýraly, músindi kompozıtsııa. Monýmenttiń jalpy bıiktigi 13,35 metrge jetedi. Ol qoladan soǵylǵan. Tuǵyry kórkem granıtten jasaldy. Avtorlary: sáýletker Samat Rústembekov jáne músinshi Renat Ábenov.

Keshenniń qurylysy 30 maýsym kúni aıaqtalady. Memleket basshysynyń qatysýymen ótetin resmı ashylý saltanaty 2 shildege belgilengen.