Qaraǵandylyqtar Abaı oblysyna gýmanıtarlyq kómektiń alǵashqy partııasyn jiberdi

QARAǴANDY. QazAqparat – Qazaqstan halqy Assambleıasynyń Qaraǵandy oblysyndaǵy ókildigi eki kún boıy Abaı oblysyndaǵy qutqarýshylar men órtten zardap shekkender úshin kómek jınady. Qajet bolatyn negizi zattar – sý, azyq-túlik, gıgıena buıymdaryn satyp aldy, dep habarlaıdy QazAqparat tilshisi.

«Abaı oblysynda orman órtinde qaza tapqandardyń otbasylary men jaqyndaryna kóńil aıtamyz. Qabyrǵamyz qaıysyp, barlyǵymen birge qaıǵyrýdamyz. Eki kún ishinde gýmanıtarlyq kómek jınadyq. Aldymen shtabqa qońyraý shalyp, birinshi kezekte ne qajet ekenin bildik. Munda sý, kofe, energetıkalyq sýsyndar, jemister, toqashtar, qaǵaz jáne dymqyl maılyqtar jáne t.b. bar», - deıdi Qaraǵandy oblysy QHA Kásipkerler qaýymdastyǵynyń tóraǵasy Nurlan Áýbákirov.

Kómek jınaýǵa etnomádenı birlestikter men QHA qurylymdary qatysty. Analar keńesi qolónershiler jasaǵan fýtbolkalar men maskalardy usyndy. Eriktiler gýmanıtarlyq kómekti jınaýǵa jáne kólikke júkteýge kómektesti.

«Bul bastamaǵa etnomádenı birlestikter de qosyldy. Otandastarymyzdyń ómirin qıǵan Abaı oblysyndaǵy apat barshamyzǵa aýyr tıip otyr. Barlyǵy óz úlesterin qosýǵa tyrysty. Zardap shekkenderge jáne órtti sóndirýge qatysqandardyń barlyǵyna, orman alqaptaryn qutqarý úshin kúresip jatqandarǵa kómektesý kerek», - dedi «Polonııa» polıak EMB tóraǵasy Vıtalıı Hmelevskıı.

Gýmanıtarlyq kómektiń birinshi partııasy jiberildi. Kelesisi daıyndalyp jatyr. Qabyldaý pýnkti Qaraǵandydaǵy «Dostyq úıinde» ornalasqan. Baılanys nómiri: 22-25-87.