Qaraǵandylyqtar 9 mamyrda máńgilik alaýdyń basyna bardy

ASTANA. QazAqparat - Qaraǵandydaǵy «Máńgilik alaý» memorıalynda Ekinshi dúnıejúzilik soǵystaǵy Jeńistiń 72 jyldyǵyna arnalǵan eske alý sharasy ótti. Bul týraly oblystyq ákimdiktiń baspasóz qyzmeti habarlaıdy.

Shara barysynda soǵys ardagerleri men tyl eńbekkerlerine arnap arnaıy shatyr tigildi.

«Jeńis kúni - qýanysh, qaıǵy jáne ótkendi eske alý sezimderi bir arnaǵa toǵysatyn kún. Mine, búgin adamzat tarıhyndaǵy eń qaıǵyly oqıǵanyń aıaqtalǵanyna 72 jyl tolyp otyr. Osy ýaqyt aralyǵynda kóp nárse ózgerdi. Tek bizdiń jarqyn bolashaǵymyz úshin, beıbit zaman úshin qan keshken ardagerlerge degen qurmetimiz ózgergen joq», - dedi quttyqtaý sózinde Qaraǵandy oblysynyń ákimi Erlan Qoshanov. 

Ol óz sózinde qaraǵandylyqtardyń fashızmdi jeńýge zor úles qosqanyn atap ótti. Sondaı-aq, 6500-den astam qaraǵandylyqtyń eren erligi úshin túrli ordendermen jáne medaldarmen marapattalǵanyn maqtan etetinin jetkizdi.

Oblys basshysy, sondaı-aq, ardagerlerge beıbit kúnde ómir súrip jatqanymyz úshin alǵys aıtty. «Jeńimpazdar býyny - bizdiń qoǵamymyzdyń maqtanyshy. Olar shynaıy Otanǵa degen súıispenshilik pen ójettiliktiń úlgisi. Biz árqashan olardy esimizden shyǵarmaımyz», - dedi ákim.

Shara sońynda bir mınýt únsizdikpen jáne zeńbirekten oq atyp, ómirden ótken soǵys ardagerlerine qurmet kórsetildi.

Aıta keteıik, byl oblysta 184 ardager Jeńis kúnin qarsy aldy. Onyń eń jasy egdesi - 98 jasta. Óńirde 13 myńnan asa tyl eńbekkeri turady.