Qaraǵandylyq jeńil atletter Azııanyń rekordyn jańartty

ASTANA. QazAqparat - Jeńil atletıkadan Óskemende ótip jatqan Qazaqstan chempıonatynda qaraǵandylyq sportshylar Azııanyń rekordyn jańartty, dep habarlaıdy QazAqparat QR Jeńil atletıka federatsııasynyń resmı saıtyna silteme jasap.

Óskemende ótip jatqan Qazaqstan chempıonatynda Qaraǵandynyń estafeta quramasy Azııanyń úzdik nátıjesin tirkedi.

«Nıkolaı Barsanovtan tálim alatyn Vıtalıı Zems, Vladıslav Grıgorev, Vıacheslav Zems, Davıd Efremov 4h200 metrlik estafetaǵa júgirgen bolatyn. Bul tórttik atalǵan qashyqtyqty 1:26:70 mınýtta júgirip ótti. Sóıtip, Azııanyń úzdik kórsetkishin ornatty. Buǵan deıingi rekord Japonııa quramasyna tıesili edi. Olar 1991 jyly 200 metrdi 1:27.04 mınýtta kesip ótken. Qaraǵandylyq atletterdiń osy nátıjesin QR Jeńil atletıka federatsııasy Azııa jeńil atletıka qaýymdastyǵyna jiberetin bolady», - dep jazylǵan aqparat kózinde.

Aıta ketetin jaıt, Qazaqstan kýbogymen salystyrǵanda chempıonatta erler arasyndaǵy estafetaǵa qatysýshylar sany artqan. Kýbokta bar-joǵy 2 qurama óner kórsetse, bul joly medal úshin 8 komanda talasty. Ol kezde Pavlodar sportshylary top jarǵan edi, osy joly kerekýlikter ekinshi orynmen shekteldi. Úzdik úshtikti Aqmola oblysynyń estafetashylary qorytyndylady.

Áıelderden eki komanda jarys jolyna shyqty. Aleksandra Zalıýbovskaıa, Roksana Ospanova, Veronıka Broslavskaıa, Valentına Stepankovskaıa bastaǵan Pavlodar quramasy Shyǵys Qazaqstan qyzdarynan jyldam bolyp shyqty.

15 qańtar, Óskemen. Jabyq keshendegi Qazaqstan chempıonaty.

4h200 metrlik estafeta, erler:

1.     Qaraǵandy obl. - 1.26,70 mın.

2.     Pavlodar obl. - 1.28,94 mın.

3.     Aqmola obl. - 1.30,21 mın.

4h200 metrlik estafeta, áıelder:

1.     Pavlodar obl. - 1.44,58 mın.

2.     ShQO. - 1.47,44 mın.