Qaraǵandylyq jastar soǵys ardagerlerine arnalǵan eskertkishter aýmaǵyn abattandyrdy

QARAǴANDY. QazAqparat - Qaraǵandy oblysynyń qalalary men aýdandarynda jastar soǵys ardagerlerine arnalǵan eskertkishter men memorıaldardy retke keltirip, aýmaqtaryn abattandyryp jatyr. Bul týraly óńir ákimdiginen málim etti, dep habarlaıdy QazAqparat.

«Urpaqtar esteligi» respýblıkalyq aktsııasy aıasynda, sondaı-aq soǵys batyrlarynyń esimderimen atalǵan kósheler men dańǵyldar kúl-qoqystan tazartylyp jatyr.

Shara «Nur Otan» partııasynyń bastamasymen jyl saıyn kóktemde jáne kúzde ótkiziledi. Oǵan partııanyń aımaqtyq fılıaldarynyń «Jas Otan» jastar qanatynyń, bastaýysh partııa uıymdarynyń ókilderi qatysýda.

«Bıyl aktsııa 20 sáýirde bastaldy. Qalalar men aýdandar turǵyndary da bul ıgi bastamada partııalyqtarǵa qoldaý kórsetti. Bul kúni Qaraǵandy oblysynyń barlyq 18 qalasy men aýdanynda Ekinshi dúnıejúzilik soǵysqa arnalǵan 23 eskertkish abattandyryldy. 27 sáýirde aktsııa jalǵasyn tapty. Qatysýshylar 26 eskertkish, memorıal men obelıskti qalypqa keltirdi. Aktsııaǵa bul joly 350 adam qatysty», - delingen ákimdik málimetinde.

Qaraǵandy oblysynda barlyǵy 171 dańq eskertkishteri bar. Olardyń ishinde memorıaldyq keshender - 12, baýyrlastar zıraty - 1, Jaýyngerlik dańq eskertkishteri - 39, Jaýyngerlik dańq obelıskileri - 91, batyrlardyń bıýsteri - 4, stellalar - 4, memorıaldyq taqtalar - 13, estelik taqtalar - 7.