Qaraǵandylyq jastar qazaqtyń qolónerimen tanysty

QARAǴANDY. QazAqparat - Sport jáne qolóner kúni aıasynda Qaraǵandy oblystyq tarıhı-ólketaný murajaıy qolóner sheberleriniń kómegimen bir mezgilde bes sheberlik sabaǵyn ótkizdi. Olardyń barlyǵy qazaqtyń dástúrli qolónerine arnaldy, dep habarlaıdy QazAqparat tilshisi.

Búgingi tańda dástúr men ádet-ǵurypty jandandyryp qana qoımaı, óskeleń urpaqty halyq mádenıetiniń qundylyqtaryna tartý mańyzdy. Naýryz meıramy osy úrdiske sebep boldy.

«Kez kelgen memleket úshin jáne árbir adam úshin halyqtyń tarıhy úlken mańyzǵa ıe. Jahandaný dáýirinde ata-babalarymyzdyń kóptegen salt-dástúri umytyldy. Endi biz tarıhymyzdyń osy mańyzdy quramdas bólikterin birtindep qalpyna keltirýdemiz. Sońǵy ýaqytta jastardyń ata-babalaryna, burynǵy turmys-tirshilikke qyzyǵýshylyq tanytatyny qýantady», - dep atap ótti Qaraǵandy oblystyq tarıhı-ólketaný murajaıynyń basshysy Erjan Nurmaǵanbetov.

N.Nurmaqov atyndaǵy mamandandyrylǵan mektep-ınternatta sheber Ǵaınıden Ábdirahmanov oqýshylardy bylǵarymen jumys isteýdiń qyr-syrymen tanystyrdy.

Q.Sátbaev atyndaǵy gımnazııa oqýshylaryna oıýly syrmaq isteý jáne jalpy kıiz basý týraly qolóner sheberi Qamash Tóleýbaeva aıtyp berdi.

Sán kolledjinde sheber Janna Qosýbaevadan stýdentter teri isi jáne taksodermııa týraly kóptegen qyzyqty aqparat aldy.

Sheber Qarshyǵa Jumabekova gýmanıtarlyq kolledj oqýshylarymen qysh ydys jasaý qupııasymen bólisti.

E.Bóketov atyndaǵy Qararaǵandy ýnıversıtetiniń tarıh fakýlteti stýdentterine quraq kórpe tigýden Qymbat Imanqulova men Aısha Úderova sheberlik sabaǵyn ótkizdi.

«Men osyndaı sheberlik sabaǵyna alǵash ret kelip otyrmyn. Sheberdiń jumysyn baqylaý qyzyqty boldy. Mysaly, men kóptegen buıymdar áli kúnge deıin eski dástúr boıynsha qolmen jasalatynyn umytyp kettim. Mundaı sheberlik sabaqtary ótkenimizdi, rýhanı jáne materıaldyq mádenıetimizdi este saqtaý úshin qajet dep sanaımyn», - dedi gýmanıtarlyq kolledj stýdenti Sofııa Verbıch.