Qaraǵandylyq jastar «Birgemiz» jalpy oblystyq aktsııasyna qatysty

QARAǴANDY. QazAqparat - Qaraǵandy oblysynyń jastar saıasaty máseleleri jónindegi basqarmasy jáne oblystyq jastar resýrstyq ortalyǵynyń bastamasymen qańtar aıynda bastalǵan aýmaqtardy qardan tazalaý «Birgemiz» jalpy aktsııasy kún saıyn jalǵasyn tabýda, dep habarlaıdy QazAqparat tilshisi.

Aktsııanyń maqsaty – oblystyń qalalary men aýdandarynda kósheler men aýlalardy qar basýyna baılanysty qart adamdardyń, maıdangerlerdiń, halyqtyń áleýmettik osal toptary jáne múmkindigi shekteýli jandardyń aýlalaryn qardan tazalaýǵa kómek kórsetý.

Kún saıyn qarttar ortalyqqa aýlalaryn qar basyp qalǵanyn, osy jaǵdaıǵa baılanysty kómek kerek ekendigin aıtyp habarlasady. Sol sebepti de Ortalyq volonterlermen birlesip, aýlalardy qardan tazalaýǵa jumyla kirisýde.

2020 jyldyń 5 aqpanynda Qaraǵandy qalasy Avtomobılnaıa, 29 kóshesinde turatyn tyl ardageri 90 jastaǵy Lıýbov Polıanskaıa turatyn úı aýlasynyń qaryn tazalaýǵa volonterler bilek sybana kiristi. Bul keıýanaǵa úıine aparatyn joldyń jabylyp qalýy, jedel járdem kóliginiń kire almaýy úlken kedergiler men qıyndyqtar týǵyzǵan edi.

Qaraǵandy oblysynyń jastar resýrstyq ortalyǵynyń mamany Jaınagúl Damyshan bul aktsııanyń bir kúndik naýqan emes ekendigin jáne ary qaraı turaqty túrde ótip turatynyn málimdedi.

«Volonterler qataryna qabyldanǵannan beri mundaı ıgi sharalarǵa únemi qatysyp kelemin. Ortalyq múshesi bolǵandyqtan, qamqorlyqqa zárý jandarǵa járdem berý qoǵamdaǵy belsendiligim – meniń azamattyq paryzym. Barlyq zamandastarymdy, qatarlastarymdy júrek qalaýyna erip, atalmysh aktsııaǵa qatysýǵa, qart adamdarǵa járdemdesýge shaqyramyn», - deıdi Qaraǵandy tehnıka-qurylys kolledjiniń volonteri Damır Erjanuly.

Aýlasyn qardan tazartqan eriktilerge qarııalar da alǵystaryn bildirýde.

«Osyndaı ıgi ispen aınalysyp, qarttar men múmkindigi shekteýli jandardyń batasy men alǵysyn arqalaǵan erikti jastarǵa rızashylyǵymdy bildiremin. Jeńistiń 75 jyldyǵyna Volonter jyly tustas kelgeni kóńildi qýantady. Osy oraıda, Memleket basshysy Qasym-Jomart Kemelulynyń ustanǵan saıasatyn aǵa býyn ókilderi aıyryqsha qamqorlyq dep biledi. Jaqsylyq pen meıirimdilik, qurmet pen izgilik kórsetetin osyndaı jastar qatary kóbeıe bersin», - deıdi Lıýbov Polıanskaıa.

Sonymen qatar, Qaraǵandy oblysy boıynsha 100-ge tarta eriktiler aktsııany jalǵastyryp, qarttardyń aýlasyn qardan tazalaýda.