Qaraǵandylyq túlek AQSh-tyń birneshe ýnıversıtetinen shaqyrý aldy
Maǵjan Tegisov bıyl Nazarbaev Zııatkerlik mektebin (NIS) bitirgen. Ol ǵarysh álemin, robototehnıkany jáne startap-jobalardy jaqsy kóredi. Túrli respýblıkalyq jáne halyqaralyq baıqaýlardyń júldegeri, barlyq Nazarbaev Zııatkerlik mektepteriniń 500-den astam oqýshysyn biriktiretin NIS Valley klýbynyń negizin qalaýshy.
«Klýb kásipkerlikke, startap-jobalarǵa qyzyǵýshylyq tanytqan oqýshylardyń basyn biriktiretin alańǵa aınaldy. Olar sarapshylardan keńes alyp, tájirıbe jınaqtap, kóshbasshylyq qasıetterdi damyta alady. Oqý jyldaryndaǵy barlyq jetistikterimniń arqasynda amerıkalyq birneshe ýnıversıtetten shaqyrý aldym. Biraq Colby College tańdadym. Bul AQSh-tyń eń úzdik JOO-nyń biri. Sonymen qatar olar maǵan prezıdenttik stıpendııa bóldi», –deıdi Maǵjan.
Bolashaqta M. Tegisov Qazaqstanda Google, Apple, Amazon sııaqty IT-kompanııa qurýdy armandaıdy.
«Jaqynda Colby College-de jasandy zerdeni zertteý boıynsha ǵylymı ortalyq ashyldy. Men jasandy ıntellekt pen mashınalyq oqytýǵa nazar aýdarǵym keledi. Ýnıversıtet zertteý úshin barlyq múmkindikti usynady. Al prezıdenttik stıpendııa maǵan birinshi kýrsta belgili kompanııalarda óz mamandyǵym boıynsha taǵylymdamadan ótýge, sondaı-aq óz startapymdy nemese bıznesimdi iske qosýǵa, zertteýlerge qarjy tartýǵa múmkindik beredi», – deıdi jas túlek.
Ol qazirdiń ózinde bıznespen aınalysyp jatyr: Barys Wear brendimen kıim jelisin saýdaǵa shyǵardy, logotıpteri bar iri kompanııalarǵa trıkotaj buıymdaryn jetkizedi.
«Barlyq oılaǵanyma qol jetkizýge, túrli qalalardaǵy ǵylymı baıqaýlarǵa qatysýǵa, ózimdi qyzyqtyratyn salany tabýǵa, sondaı-aq Stenford ýnıversıtetiniń jazǵy mektebine qatysýǵa múmkindik bergen mektebime alǵysymdy bildirgim keledi. Oqýshylarǵa aıtqym keletini: ózińizdi shynymen qyzyqtyratyn qyzmet salasyn izdeńizder», – dep qosty Maǵjan Tegisov.