Qaraǵandylyq «temir adam» marapattaryn Tuńǵysh Prezıdent ortalyǵyna tapsyrmaq

ASTANA. QazAqparat - Temirtaý qalasynda paýerlıftıng boıynsha absolıýtti álem chempıony, KSRO sport sheberi, halyqaralyq sanattaǵy sport sheberi Aıtjan Ysaqovǵa arnalǵan kórme ashyldy, dep habarlaıdy QazAqparat Qaraǵandy oblysy ákimdigine silteme jasap. 

«Ónegeli ómir» taqyrybynda Tuńǵysh Prezıdent tarıhı-mádenı ortalyǵynda ashylǵan kórme «Rýhanı jańǵyrý» baǵdarlamasy sheńberinde uıymdastyryldy.

Kórmeniń bas keıipkeri - sport jáne metallýrgııa ardageri. Aıtjan Ysaqov 40 jyldan astam ýaqyt boıy Qarmetkombınatta eńbek etken. Aýyr atletshi «Bolat» zaýyt komandasynda jáne oblystyq quramada óner kórsetken. 

Temirtaýlyq sportshyny «temir adam» dep ataıdy. Búginde jasy 75 jaqyndaǵan Aıtjan Ysaqov sportpen qosh aıtyspaı, ardagerler arasyndaǵy saıystarǵa qatysyp keledi. Óziniń sporttyq tájirıbesin aqsaqal óskeleń urpaqqa da úıretip keledi. 
Kórmege sportshynyń ár jyldary túsirilgen foto sýretteri jáne marapattary qoıyldy.

«Ózim arqyly jastarǵa jaqsy úlgi kórsetip, jigerlik pen erlik sabaǵyn ótkizgim keledi», - deıdi ekspozıtsııa keıipkeri. 

Aıtjan Ysaqov óz marapattaryn ortalyq qoryna tapsyrýdy sheshkenin jetkizdi.