Qaraǵandylyq Sarybas atty tazy respýblıkalyq jarysta jeńimpaz atandy

QARAǴANDY. QazAqparat – Kókshetaýda tazy tuqymdy ıtterdiń respýblıkalyq jarysy ótti. Oǵan Qazaqstannyń ártúrli aımaqtarynan osy tuqymnyń 40-qa jýyq ókili qatysty, dep habarlaıdy QazAqparat tilshisi.

Qaraǵandy oblysy Aqtoǵaı aýdanynyń Sarybas atty tazysy respýblıkalyq dodada jeńimpaz atandy.

«Sarybas eki jasta, ol qazaq tazysy. Bıyl ol oblystyq jáne respýblıkalyq jarystarda alty ret birinshi orynǵa ıe boldy», – dedi tazynyń ıesi Arman Oralhan.

Armannyń aıtýynsha, mundaı jarystardyń basty maqsaty – ulttyq qundylyqtardy, atap aıtqanda tazy tuqymyn saqtaý. Sondaı-aq, osy tuqymynyń eń jyldam ókilin anyqtaý.

Jarystaǵy qashyqtyq ártúrli – eki shaqyrymǵa deıin. Kókshetaýda ıtter 1,3 shaqyrym júgirdi. 30 fınalısttiń ishinde Sarybas birinshi boldy.

«Meniń oıymsha, ár qazaq tazy ustap, atqa mine bilýi kerek. Bala kezimnen beri tazylarym bar, men olarmen osy kúnge deıin aınalysyp kelemin. Itterge erekshe kútim qajet, olarǵa arnaıy tamaq daıyndaımyn. Qazir úsh tazym bar – Sarybas, Suńqar jáne Aqkıik. Biraq Sarybas erekshe. Jarysqa tek sony shyǵaramyn. Bolashaqta Sarybastyń kúshikterin ósirgim keledi. Aldaǵy ýaqytta da jarysqa qatysý josparda bar», – deıdi Arman Oralhan.