Qaraǵandylyq palýan Naýryz merekesine arnalǵan týrnırde 1 mıllıon teńge aldy

QARAǴANDY. QazAqparat – Qaraǵandyda Naýryz merekesine oraı segiz ulttyq sport túrinen jarys ótti. Qala ákiminiń júldesi úshin qazaq kúresinen jarys týrnırge ulasty. Jeńimpaz bir mıllıon teńge kóleminde aqshalaı marapatqa ıe boldy, dep habarlaıdy QazAqparat tilshisi.

Jarys ashyq aspan astyndaǵy Ortalyq mádenıet jáne demalys saıabaǵynda ótkizilmekshi bolǵan. Biraq aýa raıyna baılanysty sharany «Jastar» sport keshenine aýystyrýǵa týra keldi.

Qazaq kúresinen týrnırge barlyq óńirden 36 áýesqoı balýan qatysty. Birinshi oryn men bas júlde 1 mıllıon teńgeni 25 jasar palýan Temirlan Kóshenov jeńip aldy.

Qarqaraly aýdany Qarabulaq aýylynyń týmasy qazir Qaraǵandyda turady. Kúrespen bala kezinen áýestene bastaǵan jáne 10 jyldan astam ýaqyt boıy aınalysyp keledi.

«Týrnırge daıyndaldym, biraq jeńisti nátıje kútpedim. Qarsylastar salmaqty, laıyqty boldy. Meni kúresýge úıretken bapkerim Sergeı Kýtsenkoǵa alǵysymdy aıtamyn», - dep bólisti Temirlan Kóshenov.

Ekinshi jáne úshinshi oryndardy Buqar Jyraý aýdanynyń áýesqoı sportshylary Narıman Qasenov men Serikbek Gúlbolat ıelendi. Kúmis jáne qola júlde ıegerlerine jarty mıllıon jáne 300 myń teńge syılyq berildi.

Sport kesheninde armrestlıng, gir kóterý, toǵyzqumalaq, asyq atý, bes asyq, arqan tartý jáne qoı kóterý boıynsha buqaralyq jarystar ótti. Barlyq tilek bildirýshiler óz sheberlikteri men kúshterin kórsete aldy.