Qaraǵandylyq oqýshy ınsýlttan keıingi ońaltýǵa arnalǵan ınteraktıvti qosymsha jasady

QARAǴANDY. QazAqparat – Qaraǵandylyq 11-synyp oqýshysy Ulan Mustafın ınsýlttan keıin patsıentterge úı jaǵdaıynda ınteraktıvti ońaltýdan ótýge múmkindik beretin STROKE REC AR baǵdarlamasyn jasady, dep habarlaıdy QazAqparat tilshisi.

Oqýshynyń keńeıtilgen tehnologııalardy qoldana otyryp qosymshany jasaýyna dáriger týysy shabyt berdi. Ulan qosymshany ázirleýge bir jarym jyl jumsaǵan.

Ol kompıýterlik qosymshadan jáne kompıýterdiń janynda ornatylǵan qozǵalys sensorynyń fýnktsııasymen jabdyqtalǵan beınebaqylaý kamerasynan turady.

«STROKE REC AR keńeıtilgen shynaıylyqta ınsýltty qalpyna keltirýdi bildiredi. Qosymsha úı jaǵdaıynda oıyn formatyna beıimdelgen ınteraktıvti emdik-dene shynyqtyrý jattyǵýlaryn oryndaýǵa múmkindik beredi. Búkil jattyǵý dárigerlermen kelisilgen. ıAǵnı, naýqas úıde qosymshany ornatyp, óz betinshe jattyǵa alady. Mysaly, onda qoldy kezekpen kóterýdi qajet etetin jattyǵý bar. Qosymsha sonymen qatar patsıentterge aǵashtan alma jınaý ımıtatsııasyn usynady. Kamera qozǵalystardy tirkeıdi, al monıtor ekranynda alma jınaý arqyly naýqastyń qımylyn qaıtalaıtyn adam kórinedi. ıAǵnı, tolyqtyrylǵan shynaıylyq jasalady», – deıdi Ulan.

Qosymshanyń taǵy bir ereksheligi – baǵdarlama patsıenttiń búkil nátıjelerin jınaıdy jáne saqtaıdy, oǵan upaı beredi.

«Avtorlyq quqyqty tirkedim. Jaqyn arada Qaraǵandy klınıkalarynyń biriniń bazasynda qosymshany mashyqtan ótkizýdi josparlap otyrmyn. Synap kórý úshin ınsýlt alǵan patsıentter qatysady. Olardyń kórsetkishin dárigerler qadaǵalaıdy. Qosymshanyń tıimdiligi rastalǵannan keıin ony keńinen qoldanýǵa usyna alamyn», – dep tolyqtyrdy oqýshy.