Qaraǵandylyq monopolısterdiń tarıfterdi tómendetýinen 2 mlrd teńge únemdeldi

QARAǴANDY. QazAqparat - Qaraǵandy oblysynyń turǵyndary naýryz aıynyń basynda kommýnaldyq qyzmetterdiń tómendetilgen tarıfteri men esepteri kórsetilgen túbirtekter alady, dep habarlaıdy óńir basshysynyń resmı saıty.

Shot úlgisi qandaı bolatynyn monopolııaǵa qarsy vedomstvo ókilderi kórsetti.

«Ózderińiz biletindeı, Qazaqstan Prezıdentiniń tapsyrmasy boıynsha oblys, qala jáne aýdan ákimdikteri men bizdiń Departament kommýnaldyq qyzmet tarıfterin tómendetý boıynsha jumys júrgizdi. Bul bastamany tabıǵı monopolııalardyń barlyq sýbektileri qoldady. Tarıfter oblys boıynsha 10%-ǵa deıin tómendedi. Tutynýshylar muny naýryz aıynda alatyn túbirtekterden biletin bolady», - dedi Tabıǵı monopolııalardy retteý jáne básekelestikti qorǵaý komıteti oblystyq departamentiniń basshysy Arman Ótegenov.
Onyń aıtýynsha, oblysta tarıfterdiń tómendeýinen jalpy únemdilik mólsheri 2 mlrd teńgeni quraıdy.

Monopolıster tarıfterdi múmkindikterge baılanysty ár túrli kólemde tómendetti. Mysaly, Qaraǵandyda elektr energııasy men sýyq sý 5%-ǵa, jylý energııasy 3,5%-ǵa, káriz qyzmetteri 3%-ǵa arzandady.

Kásiporyn basshylarynyń aıtýynsha, elektr energııasyna jumsalatyn shyǵyndardy azaıtý jáne ishki shyǵyndardy ońtaılandyrý arqasynda tarıfterdi tómendeý múmkin bolyp otyr.

Sonymen qatar óńirde qoqysty shyǵarý, lıftterge qyzmet kórsetý, sondaı-aq ballondy gaz baǵasy 4-5%-ǵa tómendedi.

Al PIK qyzmetin óteıtin tólemaqylar boıynsha, ıaǵnı jyljymaıtyn múlikke qansha tóleıtinin turǵyndardyń ózderi sheshýleri tıis.