Qaraǵandylyq merdigerler bir aı ishinde joldaǵy barlyq aqaýdy joıýǵa tıis
«Qaraǵandylyqtardyń jol sapasyna qatysty barlyq narazylyǵy oryndy. Barlyq aqaýlar joıylady. Merdiger kompanııalarda kepildik mindettemeler bar. Sol qujattarǵa saı merdigerler óz esebinen olqylyqtardyń ornyn toltyrýy tıis. Ázirge ol jumystardy bastaýǵa aýa raıynyń qolaısyzdyǵy kedergi bolyp tur. Sondyqtan ýaqytsha sharalar qoldaný kerek - oıyqtar men shuńqyrlardy qolda bar materıaldarmen bitep, ýaqytsha ótkelder uıymdastyrý qajet. Al kún jylyǵan bette jóndeý jumystaryna kirisý kerek. Mamyrǵa deıin barlyq kepildik jumystar jasalýy tıis», - dedi qala ákimi Nurlan Áýbákirov.
Qala basshysynyń aıtýynsha, qazir Qaraǵandyda 152 jol kepildendirilgen merzimde. Olardyń 15-inde aqaýlar, dálirek aıtar bolsaq, shuńqyrlar, jaryqtar paıda boldy jáne jol jabyndysynyń joǵarǵy qabaty múldem buzylǵan. Merdigerlerdiń aıtýynsha, mundaı jaǵdaı sapasyz bıtýmǵa baılanysty týyndaǵan. Merdiger uıymdardyń ókilderi qala ákimine barlyq aqaýlar joıylatynyna aıtyp, sendirdi.
Nurlan Áýbákirov sondaı-aq bıylǵy jyly Qaraǵandyda 17 jol men 25 ótpeli jol jóndeletinin aıtty. Sondaı-aq, úlken joldarda buryn bastalǵan jumystar aıaqtalady. Atap aıtqanda, Qurylysshylar dańǵylyndaǵy eki jyldyq jóndeý jumystary aıaqtalýy tıis.
«Sý qubyrlary, jylý jelileriniń bir bóligi aýystyryldy. Qazir nóser káriz júıesi salynýda. Al aýa raıy jylyna salysymen jumysshylar asfaltbetondy, joljıekterdi aýystyryp, tehnıkalyq jaıaý júrginshiler jolyn jasap, jaryq ornata bastaıdy. Jumystar osy jyly aıaqtalýy tıis. Jazdyń sońyna qaraı eń jaqsy joldardyń biri osy Qurylysshylar dańǵylynda bolady», - dep túsindirdi Nurlan Áýbákirov.
Sondaı-aq, qala ákimi Maıqudyqtaǵy K. Marks jáne Magnıtogorskaıa kóshelerindegi joldyń bir bóligin jóndeý týraly josparymen bólisti. Bul joldarda shuńqyrlardy biteý jumystarymen ǵana shektelý múmkin emes, sondyqtan jaıaý júrginshiler joldary, sý aǵar kárizder, jaryqtandyrý jáne jol qıylysy júıelerin jańartýdy qarastyratyn jóndeý jumystarynyń jobasy quryldy. Atalmysh jumystar bıyl bastalady dep josparlanyp otyr. Sondaı-aq, 2019 jyly 7 magıstralǵa aǵymdaǵy jóndeý júrgizlýi tıis.
«Kepildi emes, josparly jóndeýge túspegen joldar da bar. Mysaly, Sıtı moll burylysynda, sondaı-aq Ermekov kóshesiniń qıylysynda 45 oramdaǵy úlken shuńqyrlar ýaqytsha kespe tastarmen biteldi. Keıin osy joldarda biz aǵymdaǵy jóndeý jumystaryn júrgizemiz. Buqar jyraý dańǵylynyń jol ótpesinen 16-shy dúkenge deıingi ýchaske jospar boıynsha bıyl jóndeýden ótedi. Buqar jyraý dańǵylynda kólik keptelisin boldyrmas úshin jumysty birtindep jasaımyz. Kepildik jóndeý júrgizilgen barlyq joldarda merdiger kompanııalar týraly aqparat kórsetilgen stendter qoıý kerek. Qala turǵyndary osy jol ýchaskesiniń sapasyna jaýap beretin naqty uıymdy bilsin», - dedi qala ákimi.