Qaraǵandylyq kenshiler áýleti «Eńbek joly» respýblıkalyq baıqaýynyń laýreaty atandy

QARAǴANDY. QazAqparat – Osakarov aýdany Molodejnyı kentinde turatyn Kýrınder kenshiler áýleti «Eńbek joly» respýblıkalyq baıqaýynda úshinshi orynǵa ıe boldy. Marapattaý «Jalpyǵa Ortaq Eńbek Qoǵamyna» respýblıkalyq forýmy aıasynda ótti, dep habarlaıdy QazAqparat tilshisi.

Kýrınder otbasy «Eńbek áýleti» nomınatsııasynda úzdik atandy. «Molodejnyı» kómir kenishinde áýlettiń úsh urpaǵy eńbek etip keledi.

Eńbek áýletiniń alǵashqy kenshisi – Aleksandr Kýrın. Ol kómir razrezi qurylysynyń bastaýynda turdy. 40 jyldan astam ekskavator mashınısi bolyp jumys istedi. «Shahter Dańqy» Qurmet belgisiniń úsh dárejesin ıelengen.

Onyń jubaıy Aleksandra ómiriniń 18 jylyn óndiriske arnaǵan, «Eńbek ardageri» medalimen marapattalǵan.

2004 jyldan bastap Aleksandr men Aleksandra Kýrına qurmetti demalysta. Olardyń jolyn qyzy, uly, kelini jáne nemeresi jalǵastyrýda.

Uly Igor Kýrın ákesiniń izin basty. Ol 21 jyl ekskavator mashınısi bolyp jumys isteıdi. III dárejeli «Shahter dańqy» belgisiniń kavaleri, «Kómir ónerkásibiniń qurmetti qyzmetkeri» ataǵyna ıe boldy. Jubaıy Natalıa - synama alǵysh tehnıkasynyń mashınısi, III dárejeli «Eńbek dańqy» belgisimen marapattalǵan.

Dańqty kenshi mamandyǵyn jalǵastyrýshy – kadrlar jónindegi ınspektor bolyp jumys isteıtin qyzy Tatıana Martynchýk jáne nemeresi geologııalyq bólimniń ınjeneri Nadejda Kýrına.

Otbasy eren eńbegi úshin 200 myń teńgeniń sertıfıkatymen, syılyqpen jáne dıplommen marapattaldy.

Eńbek mınıstrliginiń habarlaýynsha, «Eńbek joly» baıqaýyna 550 ótinim kelip túsken.