Qaraǵandylyq kásiporyndar 560,5 mlrd teńgeniń ónimin óndirdi

QARAǴANDY. QazAqparat – Qaraǵandy oblysynda eki aıda 560,5 mlrd teńgeniń ónerkásip ónimi óndirildi. Investıtsııa kólemi 85,5 mlrd teńgeni quraıdy, bul kórsetkish ótken jylmen salystyrǵanda 14%-ke ósedi dep kútilýde, dep habarlaıdy QazAqparat tilshisi.

Qańtar-aqpan aılaryndaǵy oblystyń áleýmettik-ekonomıkalyq damýynyń boljamdy qorytyndylary onlaın rejıminde apparattyq keńeste talqylandy.

«Ónerkásip óniminiń naqty kólem ındeksi 560,5 mlrd teńge kólemimen 99-100% dálizinde boljanýda. Óńdeý ónerkásibinde ónim óndirisi 2-3%-ǵa ósedi. Oblystyń negizgi kapıtalyna ınvestıtsııalar 13,9% ósimmen 85,5 mlrd teńge bolady. Qurylysty 3%-ǵa nemese aqshalaı mánde - 18,8 mlrd teńgege ulǵaıtý kútilýde», - dep baıandady ekonomıka basqarmasynyń basshysy Azamat Muqanov.

Aldyn ala derekter boıynsha, 93,3 myń sharshy metr turǵyn úı paıdalanýǵa berildi, bul kórsetkish ótken jyldyń sáıkes kezeńimen salystyrǵanda 14,9%-ǵa ósti.

Aýyl sharýashylyǵynda oń dınamıka baıqalady. Óńirde et pen sút óndirisi artty.

«Jalpy eki aıdyń qarqyny jaman emes. Investıtsııalar ósti. Óńdeý ónerkásibinde de kórsetkishter jaqsy. Qurylys salasynda da oń ózgeris bar. Osy qarqynda ekonomıkanyń barlyq salalary boıynsha bekitilgen ındıkatorlardy saqtap, oryndaý qajet», - dep atap ótti oblys ákimi Jeńis Qasymbek.