Qaraǵandylyq kásipkerler blokpostarǵa ystyq as aparyp berdi

QARAǴANDY. QazAqparat – Karantınge baılanysty qıyn kezeńde qaraǵandylyqtar bas biriktirdi. Kásipkerler óz densaýlyqtaryn qaýipke tigip, qyzmet atqaryp júrgen polıtseıler men medıtsına mamandaryn qoldaýǵa bel býdy. Blok beketterge palaý jáne beshbarmaq sekildi ystyq as jetkizdi, dep habarlaıdy QazAqparat tilshisi.

Igi iske Qaraǵandy oblysynyń bas ımamy Ómirzaq Bekqojanyń qoldaýymen «Mansur» TQKO jáne «Aspap» JK bastamashy boldy. Osyndaı sharany basqa qaraǵandylyqtar da júzege asyrdy.

Jetkizý kezinde sanıtarlyq talaptar saqtalǵan.

«Men ózim polıtsııada 10 jyldan astam qyzmet ettim. Qazirgi tańda burynǵy áriptesterim qandaı jýapkershilikti moıyndaryna alǵanyn jaqsy túsinemin. Osy qıyn sátte olarǵa moraldyq qoldaý kórsetip, qaısarlyǵy úshin alǵys bildirgimiz keledi. Koronavırýs pen TJ rejımi men karantın jaqyn arada aıaqtalady dep úmittenemin. Táýlik boıy jumys isteýge májbúr bolǵan jerlesterimiz shańyraqtaryna, óz otbasyna qaıta oralsyn», - deıdi kásipker Qýandyq Ǵabdýalıev.

Igi ister madaq pen bedel úshin jasalyp otyrmaǵanyn atap ótti oblystyń bas ımamy.

«Bir-birimizge moraldyq jáne materıaldyq kómek kórseteıik. Qıyndyqtardy birge ótkeri anaǵurlym ońaı bolady. Ózderińizdi saqtańyzdar, karantın talaptaryn oryndańyzdar!» – dep Ómirzaq Bekqoja qaraǵandylyqtarǵa úndeý aıtty.